5. дутийасена̄санасиккха̄падаван̣н̣ана̄

116. дутийасена̄санасиккха̄паде – бхисӣти ман̃чакабхиси ва̄ пӣт̣хакабхиси ва̄. чимилика̄дӣнипи пуримасиккха̄паде вуттаппака̄ра̄нийева. нисӣдананти садасам̣ ведитаббам̣. паччаттхаран̣анти па̄ва̄ро коджавоти еттакамева вуттам̣. тин̣асантха̄роти йесам̣ кесан̃чи тин̣а̄нам̣ сантха̄ро. еса найо пан̣н̣асантха̄ре. париккхепам̣ атиккамантасса̄ти еттха пат̣хамапа̄дам̣ атикка̄ментасса дуккат̣ам̣, дутийа̄тиккаме па̄читтийам̣. апариккхиттасса упача̄ро на̄ма сена̄санато две лед̣д̣упа̄та̄.

ана̄пуччхам̣ ва̄ гаччхеййа̄ти еттха бхиккхумхи сати бхиккху а̄пуччхитаббо. тасмим̣ асати са̄ман̣еро, тасмим̣ асати а̄ра̄мико, тасмимпи асати йена виха̄ро ка̄рито со виха̄раса̄мико, тасса ва̄ куле йо кочи а̄пуччхитаббо. тасмимпи асати чатӯсу па̄са̄н̣есу ман̃чам̣ т̣хапетва̄ ман̃че авасесаман̃чапӣт̣ха̄ни а̄ропетва̄ упари бхисиа̄дикам̣ дасавидхампи сеййам̣ ра̄сим̣ каритва̄ да̄рубхан̣д̣ам̣ маттика̄бхан̣д̣ам̣ пат̣иса̄метва̄ два̄рава̄тапа̄на̄ни пидахитва̄ гамийаваттам̣ пӯретва̄ гантаббам̣. саче пана сена̄санам̣ овассати, чхаданаттхан̃ча тин̣ам̣ ва̄ ит̣т̣хака̄ ва̄ а̄нӣта̄ хонти, саче уссахати, чха̄детаббам̣. но че саккоти, йо ока̄со ановассако, таттха ман̃чапӣт̣ха̄дӣни никкхипитва̄ гантаббам̣. саче саббампи овассати, уссахантена антога̄ме упа̄сака̄нам̣ гхаре т̣хапетаббам̣. саче тепи ‘‘сан̇гхикам̣ на̄ма бханте бха̄рийам̣, аггида̄ха̄дӣнам̣ бха̄йа̄ма̄’’ти на сампат̣иччханти, аджджхока̄сепи па̄са̄н̣а̄нам̣ упари ман̃чам̣ т̣хапетва̄ сесам̣ пуббе вуттанайенева никкхипитва̄ тин̣ехи ча пан̣н̣ехи ча пат̣иччха̄детва̄ гантум̣ ват̣т̣ати. йан̃хи таттха ан̇гаматтампи авасиссати, там̣ ан̃н̃есам̣ таттха а̄гата̄нам̣ бхиккхӯнам̣ упака̄рам̣ бхависсатӣти.

117. виха̄расса упача̄ретиа̄дӣсу виха̄рассӯпача̄ро на̄ма паривен̣ам̣. упат̣т̣ха̄наса̄ла̄ти паривен̣абходжанаса̄ла̄. ман̣д̣апоти паривен̣аман̣д̣апо. руккхамӯланти паривен̣аруккхамӯлам̣. айам̣ та̄ва найо курундат̣т̣хакатха̄йам̣ вутто. кин̃ча̄пи вутто, атха кхо виха̄роти антогаббхо ва̄ ан̃н̃ам̣ ва̄ саббапариччханнам̣ гуттасена̄санам̣ ведитаббам̣. виха̄расса упача̄рети тасса бахи а̄санне ока̄се. упат̣т̣ха̄наса̄ла̄йам̣ ва̄ти бходжанаса̄ла̄йам̣ ва̄. ман̣д̣апе ва̄ти апариччханне париччханне ва̄пи бахӯнам̣ саннипа̄таман̣д̣апе. руккхамӯле ваттаббам̣ наттхи. а̄патти дуккат̣асса̄ти вуттаппака̄ран̃хи дасавидхам̣ сеййам̣ антогаббха̄димхи гуттат̣т̣ха̄не пан̃н̃апетва̄ гаччхантасса йасма̄ сеййа̄пи сена̄санампи упачика̄хи палуджджати, ваммикара̄сийева хоти, тасма̄ па̄читтийам̣ вуттам̣. бахи пана упат̣т̣ха̄наса̄ла̄дӣсу пан̃н̃апетва̄ гаччхантасса сеййа̄маттамева нассеййа, т̣ха̄насса агуттата̄йа на сена̄санам̣, тасма̄ еттха дуккат̣ам̣ вуттам̣. ман̃чам̣ ва̄ пӣт̣хам̣ ва̄ти еттха йасма̄ на сакка̄ ман̃чапӣт̣хам̣ сахаса̄ упачика̄хи кха̄йитум̣, тасма̄ там̣ виха̄репи сантхаритва̄ гаччхантасса дуккат̣ам̣ вуттам̣. виха̄рӯпача̄ре пана там̣ виха̄рача̄рикам̣ а̄хин̣д̣анта̄пи дисва̄ пат̣иса̄мессанти.

118. уддхаритва̄ гаччхатӣти еттха уддхаритва̄ гаччхантена ман̃чапӣт̣хакава̄т̣ам̣ саббам̣ апанетва̄ сам̣харитва̄ чӣваравам̣се лаггетва̄ гантаббам̣. паччха̄ а̄гантва̄ васанакабхиккхуна̄пи пуна ман̃чапӣт̣хам̣ ва̄ пан̃н̃апетва̄ сайитва̄ гаччхантена татхева ка̄таббам̣. антокут̣т̣ато сеййам̣ бахикут̣т̣е пан̃н̃апетва̄ васантена гаманака̄ле гахитат̣т̣ха̄нейева пат̣иса̄метаббам̣. упарипа̄са̄дато оропетва̄ хет̣т̣ха̄па̄са̄де васантассапи есева найо. раттит̣т̣ха̄надива̄т̣т̣ха̄несу ман̃чапӣт̣хам̣ пан̃н̃апетва̄пи гаманака̄ле пуна гахитат̣т̣ха̄нейева т̣хапетаббам̣.

а̄пуччхам̣ гаччхатӣти еттха̄йам̣ а̄пуччхитабба̄на̄пуччхитаббавиниччхайо – йа̄ та̄ва бхӯмийам̣ дӣгхаса̄ла̄ ва̄ пан̣н̣аса̄ла̄ ва̄ хоти, йам̣ ва̄ руккхаттхамбхесу, катагехам̣ упачика̄нам̣ ут̣т̣ха̄нат̣т̣ха̄нам̣ хоти, тато паккамантена та̄ва а̄пуччхитва̄ва паккамитаббам̣. тасмин̃хи катипайа̄ни диваса̄ни аджаггийама̄не ваммика̄ва сантит̣т̣ханти. йам̣ пана па̄са̄н̣апит̣т̣хийам̣ ва̄ па̄са̄н̣аттхамбхесу ва̄ катасена̄санам̣ силуччайален̣ам̣ ва̄ судха̄литтасена̄санам̣ ва̄ йаттха упачика̄сан̇ка̄ наттхи, тато паккамантасса а̄пуччхитва̄пи ана̄пуччхитва̄пи гантум̣ ват̣т̣ати, а̄пуччханам̣ пана ваттам̣. саче та̄дисепи сена̄сане екена пассена упачика̄ а̄роханти, а̄пуччхитва̄ва гантаббам̣. йо пана а̄гантуко бхиккху сан̇гхикам̣ сена̄санам̣ гахетва̄ васантам̣ бхиккхум̣ ануваттанто аттано сена̄санам̣ аггахетва̄ васати, йа̄ва со на ган̣ха̄ти, та̄ва там̣ сена̄санам̣ пуримабхиккхуссева палибодхо. йада̄ пана со сена̄санам̣ гахетва̄ аттано иссарийена васати, тато пат̣т̣ха̄йа а̄гантукассева палибодхо. саче убхопи вибхаджитва̄ ган̣ханти, убхиннампи палибодхо. маха̄паччарийам̣ пана вуттам̣ – ‘‘саче две тайо екато хутва̄ пан̃н̃апенти, гаманака̄ле саббехипи а̄пуччхитаббам̣. тесу че пат̣хамам̣ гаччханто ‘паччхимо джаггиссатӣ’ти а̄бхогам̣ катва̄ гаччхати ват̣т̣ати. паччхимасса а̄бхогена мутти наттхи. бахӯ екам̣ песетва̄ сантхара̄пенти, гаманака̄ле саббехи ва̄ а̄пуччхитаббам̣, екам̣ ва̄ песетва̄ а̄пуччхитаббам̣. ан̃н̃ато ман̃чапӣт̣ха̄дӣни а̄нетва̄ ан̃н̃атра васитва̄пи гаманака̄ле таттхева нетабба̄ни. саче ан̃н̃а̄ва̄сато а̄нетва̄ васама̄насса ан̃н̃о вуд̣д̣хатаро а̄гаччхати, на пат̣иба̄хитаббо, ‘майа̄ бханте ан̃н̃а̄ва̄сато а̄нӣтам̣, па̄катикам̣ кареййа̄тха̄’ти ваттаббам̣. тена ‘евам̣ карисса̄мӣ’ти сампат̣иччхите итарасса гантум̣ ват̣т̣ати. еваман̃н̃аттха харитва̄пи сан̇гхикапарибхогена парибхун̃джантасса нат̣т̣хам̣ ва̄ джин̣н̣ам̣ ва̄ чорехи ва̄ хат̣ам̣ гӣва̄ на хоти, пуггаликапарибхогена парибхун̃джантасса пана гӣва̄ хоти. ан̃н̃асса ман̃чапӣт̣хам̣ пана сан̇гхикапарибхогена ва̄ пуггаликапарибхогена ва̄ парибхун̃джантасса нат̣т̣хам̣ гӣва̄йева’’.

кеначи палибуддхам̣ хотӣти вуд̣д̣хатарабхиккхӯиссарийайаккхасӣхава̄л̣амигакан̣хасаппа̄дӣсу йена кеначи сена̄санам̣ палибуддхам̣ хоти. са̄пеккхо гантва̄ таттха т̣хито а̄пуччхати, кеначи палибуддхо хотӣти аджджева а̄гантва̄ пат̣иджаггисса̄мӣти евам̣ са̄пеккхо надӣпа̄рам̣ ва̄ га̄мантарам̣ ва̄ гантва̄ йаттхасса гаманачиттам̣ уппаннам̣, таттхева т̣хито кан̃чи песетва̄ а̄пуччхати, надӣпӯрара̄джачора̄дӣсу ва̄ кеначи палибуддхо хоти упаддуто, на саккоти пачча̄гантум̣, евам̣бхӯтассапи ана̄патти. сесам̣ пат̣хамасиккха̄паде вуттанайамева саддхим̣ самут̣т̣ха̄на̄дӣхӣти.

дутийасена̄санасиккха̄падам̣ пан̃чамам̣.