3. песун̃н̃асиккха̄падаван̣н̣ана̄

36. татийасиккха̄паде – бхан̣д̣анаджа̄та̄нанти сан̃джа̄табхан̣д̣ана̄нам̣. бхан̣д̣ананти калахасса пуббабха̄го, ‘‘имина̄ ча имина̄ ча идам̣ катам̣; евам̣ вутте евам̣ ваккха̄ма̄’’тиа̄дикам̣ сакасакапаккхе саммантанам̣. калахоти а̄паттига̄мико ка̄йава̄ча̄вӣтиккамо. вива̄доти вигга̄хикакатха̄. там̣ вива̄дам̣ а̄панна̄нам̣ вива̄да̄панна̄нам̣. песун̃н̃анти писун̣ава̄чам̣, пийабха̄васса сун̃н̃акаран̣ава̄чанти вуттам̣ хоти.

37. бхиккхупесун̃н̃ети бхиккхӯнам̣ песун̃н̃е; бхиккхуто сутва̄ бхиккхуна̄ бхиккхусса упасам̣хат̣апесун̃н̃ети аттхо.

38. двӣха̄ка̄рехӣти двӣхи ка̄ран̣ехи. пийакамйасса ва̄ти ‘‘евам̣ ахам̣ етасса пийо бхависса̄мӣ’’ти аттано пийабха̄вам̣ паттхайама̄насса ва̄. бхеда̄дхиппа̄йасса ва̄ти ‘‘евамайам̣ етена саддхим̣ бхиджджиссатӣ’’ти парасса парена бхедам̣ иччхантасса ва̄. джа̄титопӣтиа̄ди саббам̣ пуримасиккха̄паде вуттанайамева. идха̄пи бхиккхуним̣ а̄дим̣ катва̄ саббе анупасампанна̄ на̄ма.

на пийакамйасса на бхеда̄дхиппа̄йасса̄ти екам̣ аккосантам̣ екан̃ча кхамантам̣ дисва̄ ‘‘ахо нилладжджо, ӣдисампи на̄ма бхавантам̣ пуна ваттаббам̣ ман̃н̃иссатӣ’’ти евам̣ кевалам̣ па̄пагарахита̄йа бхан̣антасса ана̄патти. сесам̣ утта̄наттхамева. тисамут̣т̣ха̄нам̣ – ка̄йачиттато ва̄ча̄читтато ка̄йава̄ча̄читтато ча самут̣т̣ха̄ти, кирийам̣, сан̃н̃а̄вимоккхам̣, сачиттакам̣, локаваджджам̣, ка̄йакаммам̣, вачӣкаммам̣, акусалачиттам̣, тиведананти.

песун̃н̃асиккха̄падам̣ татийам̣.