1. каммаккхандхакам̣

таджджанӣйакаммакатха̄

1. чӯл̣аваггасса пат̣хаме каммаккхандхаке та̄ва пан̣д̣укалохитака̄ти пан̣д̣уко чева лохитако ча̄ти чхаббаггийесу две джана̄; тесам̣ нисситака̄пи пан̣д̣укалохитака̄твева пан̃н̃а̄йанти. балава̄балавам̣ пат̣имантетха̄ти сут̣т̣хубалавам̣ пат̣ивадатха. аламаттхатара̄ти саматтхатара̄.

таджджанӣйакаммакатха̄ нит̣т̣хита̄.

адхаммакаммадва̄дасакакатха̄

4. асаммукха̄ катантиа̄дӣсу сан̇гхадхаммавинайапуггаласаммукха̄нам̣ вина̄ катам̣, чудитакам̣ аппат̣ипуччхитва̄ катам̣, тассева аппат̣ин̃н̃а̄йа катам̣. адесана̄га̄минийа̄ти па̄ра̄джика̄паттийа̄ ва̄ сан̇гха̄дисеса̄паттийа̄ ва̄. еттха пуримакесу тӣсу тикесу нава пада̄ адхамменакатам̣ ваггенакатанти имехи саддхим̣ екекам̣ гахетва̄ нава тика̄ вутта̄. евам̣ саббепи два̄даса тика̄ хонти. пат̣ипаккхавасена суккапаккхесупи етейева два̄даса тика̄ вутта̄.

6. анануломикехи гихисам̣саггехӣти паббаджита̄нам̣ анануччхавикехи сахасокита̄дӣхи гихисам̣саггехи.

тин̣н̣ам̣, бхиккхаве, бхиккхӯнантиа̄ди екекена̄пи ан̇гена таджджанӣйакаммам̣ ка̄тум̣ ват̣т̣атӣти дассанаттхам̣ вуттам̣. таджджанӣйасса хи висесена бхан̣д̣анака̄ракаттам̣ ан̇гам̣, нийассасса абхин̣ха̄паттикаттам̣, пабба̄джанӣйасса куладӯсакаттам̣ вуттам̣. имесу пана тӣсу ан̇гесу йена кеначи сабба̄нипи ка̄тум̣ ват̣т̣ати. йади евам̣ йам̣ чампеййаккхандхаке вуттам̣ – ‘‘таджджанӣйакамма̄рахасса нийассакаммам̣ кароти…пе… упасампада̄рахам̣ аббхети; евам̣ кхо упа̄ли адхаммакаммам̣ хоти авинайакаммам̣, еван̃ча пана сан̇гхо са̄тиса̄ро хотӣ’’ти идам̣ вируджджхатӣти. идан̃ча на вируджджхати. касма̄? вачанаттхана̄наттато, ‘‘таджджанӣйакамма̄рахасса̄’’ти имасса хи вачанасса каммасаннит̣т̣ха̄нам̣ аттхо. ‘‘тин̣н̣ам̣, бхиккхаве’’тиа̄дивачанасса ан̇гасамбхаво, тасма̄ йада̄ сан̇гхена саннипатитва̄ ‘‘идам̣ на̄ма имасса бхиккхуно каммам̣ карома̄’’ти саннит̣т̣ха̄нам̣ катам̣ хоти, тада̄ камма̄рахо на̄ма хоти. тасса имина̄ лаккхан̣ена таджджанӣйа̄дикамма̄рахасса нийассакамма̄дикаран̣ам̣ адхаммакамман̃чева авинайакамман̃ча̄ти ведитаббам̣. йасса пана бхан̣д̣анака̄рака̄дӣсу ан̇гесу ан̃н̃атарам̣ ан̇гам̣ аттхи, тасса а̄кан̇кхама̄но сан̇гхо йатха̄нун̃н̃а̄тесу ан̇гесу ча каммесу ча йена кеначи ан̇гена йам̣кин̃чи каммам̣ ваваттхапетва̄ там̣ бхиккхум̣ камма̄рахам̣ катва̄ каммам̣ кареййа. айаметтха виниччхайо. евам̣ пуббена̄парам̣ самети.

таттха кин̃ча̄пи таджджанӣйакамме бхан̣д̣анака̄ракавасена каммава̄ча̄ вутта̄, атха кхо ба̄ласса абйаттасса а̄паттибахуласса таджджанӣйакаммам̣ каронтена ба̄лаабйаттавасенева каммава̄ча̄ ка̄табба̄. еван̃хи бхӯтена ваттхуна̄ катам̣ каммам̣ хоти, на ча ан̃н̃асса каммасса ваттхуна̄. касма̄? йасма̄ идампи анун̃н̃а̄танти. еса найо саббаттха. ат̣т̣ха̄раса самма̄ваттанаваттхӯни па̄рива̄сикаккхандхаке ван̣н̣айисса̄ма.

адхаммакаммадва̄дасакакатха̄ нит̣т̣хита̄.

наппат̣иппассамбхетаббаат̣т̣ха̄расака̄дикатха̄

8. ломам̣ па̄тентӣти панналома̄ хонти; бхиккхӯ ануваттантӣти аттхо. неттха̄рам̣ ваттантӣти ниттхаранта̄нам̣ етанти неттха̄рам̣; йена сакка̄ нисса̄ран̣а̄ ниттхаритум̣, там̣ ат̣т̣ха̄расавидхам̣ самма̄ваттанам̣ ваттантӣти аттхо. киттакам̣ ка̄лам̣ ваттам̣ пӯретаббанти? даса ва̄ пан̃ча ва̄ диваса̄ни. имасмин̃хи каммаккхандхаке еттакена ваттам̣ пӯритамева хоти.

наппат̣иппассамбхетаббаат̣т̣ха̄расака̄дикатха̄ нит̣т̣хита̄.

нийассакаммакатха̄

11. сеййасакаваттхусмим̣ – аписсу бхиккхӯ паката̄ти аписсу бхиккхӯ ниччам̣ бйа̄ват̣а̄ хонти. сесам̣ таджджанӣйе вуттасадисамева.

нийассакаммакатха̄ нит̣т̣хита̄.

пабба̄джанӣйакаммакатха̄

21. ассаджипунаббасукаваттху сан̇гха̄дисесаван̣н̣ана̄йам̣ вуттам̣.

27. ка̄йикена давена̄тиа̄дӣсу панеттха ка̄йико даво на̄ма ка̄йакӣл̣а̄ вуччати. сесапададвайепи есева найо. ка̄йико ана̄ча̄ро на̄ма ка̄йадва̄ре пан̃н̃аттасиккха̄падавӣтиккамо вуччати. сесадвайепи есева найо. ка̄йикам̣ упагха̄тикам̣ на̄ма ка̄йадва̄ре пан̃н̃аттасиккха̄падасса асиккханабха̄вена упахананам̣ вуччати; на̄санам̣ вина̄сананти аттхо. сесадвайепи есева найо. ка̄йико миччха̄джӣво на̄ма пат̣иккхиттаведжджакамма̄дивасена телапачанаарит̣т̣хапачана̄дӣни. ва̄часико миччха̄джӣво на̄ма гихӣнам̣ са̄санасампат̣иччхана̄рочана̄дӣни. ка̄йикава̄часико на̄ма тадубхайам̣. сесам̣ таджджанӣйе вуттанайамева.

пабба̄джанӣйакаммакатха̄ нит̣т̣хита̄.

пат̣иса̄ран̣ӣйакаммакатха̄

33. судхаммаваттхусмим̣ пана – анапалокетва̄ти на а̄пуччхитва̄. етадавоча̄ти ким̣ те гахапати тхера̄нам̣ пат̣ийаттанти саббам̣ вивара̄петва̄ дисва̄ етам̣ авоча. ека̄ ча кхо идха наттхи йадидам̣ тиласам̣гул̣ика̄ти йа̄ айам̣ тиласаккхалика̄ на̄ма вуччати, са̄ наттхӣти аттхо. тасса кира гахапатино вам̣се а̄димхи еко пӯвийо ахоси. тена нам̣ тхеро джа̄тийа̄ кхум̣сетука̄мо евама̄ха. йадева кин̃чӣти евам̣ бахум̣ буддхавачанам̣ ратанам̣ паха̄йа кин̃чидева тиласам̣гул̣ика̄вачанам̣ бха̄ситам̣. куккут̣апотакауда̄харан̣ена идам̣ дассети ‘‘йатха̄ со нева ка̄кавасситам̣ на куккут̣авасситам̣ ака̄си, евам̣ тайа̄пи нева бхиккхувачанам̣ на гихивачанам̣ вутта’’нти.

пат̣иса̄ран̣ӣйакаммакатха̄ нит̣т̣хита̄.

адхаммакамма̄дидва̄дасакакатха̄

37. асаммукха̄ катантиа̄дайо тика̄ вуттаппака̄ра̄ ева.

39. ан̇гасаманна̄гамо пуримехи асадисо. таттха йатха̄ ла̄бхам̣ на лабханти; евам̣ парисакканто параккаманто ала̄бха̄йа парисаккати на̄ма. еса найо анаттха̄дӣсу. таттха анаттхоти аттхабхан̇го. ана̄ва̄соти тасмим̣ т̣ха̄не авасанам̣. гихӣнам̣ буддхасса аван̣н̣анти гихӣнам̣ сантике буддхасса аван̣н̣ам̣ бха̄сати. дхаммикам̣ пат̣иссавам̣ на сачча̄петӣти йатха̄ саччо хоти, евам̣ на кароти; васса̄ва̄сам̣ пат̣иссун̣итва̄ на гаччхати, ан̃н̃ам̣ ва̄ еварӯпам̣ кароти. пан̃чаннам̣ бхиккхаветиа̄ди екан̇генапи камма̄рахабха̄вадассанаттхам̣ вуттам̣. сесаметтха утта̄наттхан̃чева, таджджанӣйе ча вуттанайамева.

адхаммакамма̄дидва̄дасакакатха̄ нит̣т̣хита̄.

а̄паттийа̄ адассане уккхепанӣйакаммакатха̄

46. чханнаваттхусмим̣ – а̄ва̄сапарампаран̃ча бхиккхаве сам̣сатха̄ти сабба̄ва̄сесу а̄рочетха.

50. бхан̣д̣анака̄ракотиа̄дӣсу бхан̣д̣ана̄дипаччайа̄ а̄паннам̣ а̄паттим̣ ропетва̄ тасса̄ адассанейева каммам̣ ка̄таббам̣. тика̄ вуттаппака̄ра̄ ева.

51. самма̄ваттана̄йам̣ панеттха течатта̄лӣса ватта̄ни. таттха на ануддхам̣сетабботи на чодетаббо. на бхиккху бхиккхӯхӣти ан̃н̃о бхиккху ан̃н̃ехи бхиккхӯхи на бхиндитаббо. на гихиддхаджоти ода̄таваттха̄ни аччхиннадасапуппхадаса̄ни ча на дха̄ретабба̄ни. на титтхийаддхаджоти кусачӣра̄дӣни на дха̄ретабба̄ни. на а̄са̄детабботи на апаса̄детаббо. анто ва̄ бахи ва̄ти виха̄расса анто ва̄ бахи ва̄. на титтхийа̄дипадаттайам̣ утта̄намева. сесам̣ саббам̣ па̄рива̄сикаккхандхаке ван̣н̣айисса̄ма. сесам̣ таджджанӣйе вуттанайамева. а̄паттийа̄ аппат̣икамме уккхепанӣйакаммам̣ имина̄ садисамева.

65. арит̣т̣хаваттху кхуддакаван̣н̣ана̄йам̣ вуттам̣. ‘‘бхан̣д̣анака̄рако’’тиа̄дӣсу йам̣ дит̣т̣хим̣ нисса̄йа бхан̣д̣ана̄дӣни кароти, тасса̄ аппат̣иниссаггейева каммам̣ ка̄таббам̣. сесам̣ таджджанӣйе вуттанайамева. самма̄ваттана̄йампи хи идха течатта̄лӣсам̣йева ватта̄нӣти.

а̄паттийа̄ адассане уккхепанӣйакаммакатха̄ нит̣т̣хита̄.

каммаккхандхакаван̣н̣ана̄ нит̣т̣хита̄.