8. сӯкаракхатасуттаван̣н̣ана̄

528. ат̣т̣хаме сӯкаракхата̄йанти сӯкаракхатален̣е. кассапабуддхака̄ле кира там̣ лен̣ам̣ екасмим̣ буддхантаре патхавийа̄ вад̣д̣хама̄на̄йа антобхӯмигатам̣ джа̄там̣. атхекадивасам̣ еко сӯкаро тасса чхаданапарийантасамӣпе пам̣сум̣ кхан̣и. деве вут̣т̣хе пам̣су дхота̄, чхаданапарийанто па̄кат̣о ахоси. еко ваначарако дисва̄ ‘‘пуббе сӣлавантехи парибхуттат̣т̣ха̄нена бхавитаббам̣, пат̣иджаггисса̄ми на’’нти самантато пам̣сум̣ апанетва̄ лен̣ам̣ содхетва̄ кут̣ипариккхепам̣ катва̄ два̄рава̄тапа̄нам̣ йоджетва̄ супаринит̣т̣хитасудха̄каммачиттакаммам̣ раджатапат̣т̣асадиса̄йа ва̄лика̄йа сантхаритам̣ паривен̣ам̣ катва̄ ман̃чапӣт̣хам̣ пан̃н̃а̄петва̄ бхагавато васанаттха̄йа ада̄си, лен̣ам̣ гамбхӣрам̣ ахоси отаритва̄ а̄рухитаббам̣. там̣ сандха̄йетам̣ вуттам̣. параманипаччака̄ранти бха̄ванапум̣сакам̣, параманипаччака̄рӣ хутва̄ паваттама̄но паваттатӣти вуттам̣ хоти. ануттарам̣ йогаккхеманти арахаттам̣. саппатиссоти саджет̣т̣хако. сесам̣ саббаттха утта̄наттхамева̄ти.

сӯкаракхатавагго чхат̣т̣хо.