7. дутийасаман̣абра̄хман̣асуттаван̣н̣ана̄

477. саттаме саддхиндрийам̣ наппаджа̄нантӣти дуккхасаччавасена на паджа̄нанти. саддхиндрийасамудайам̣ наппаджа̄нантӣти самудайасаччавасена на паджа̄нанти. евам̣ ниродхам̣ ниродхасаччавасена, пат̣ипадам̣ маггасаччавасена̄ти. сесесупи есева найо.

суккапаккхе пана адхимоккхавасена а̄ваджджанасамудайа̄ саддхиндрийасамудайо хоти, паггахавасена а̄ваджджанасамудайа̄ вӣрийиндрийасамудайо, упат̣т̣ха̄навасена а̄ваджджанасамудайа̄ сатиндрийасамудайо, авиккхепавасена а̄ваджджанасамудайа̄ сама̄дхиндрийасамудайо, дассанавасена а̄ваджджанасамудайа̄ пан̃н̃индрийасамудайо хоти. татха̄ чхандавасена а̄ваджджанасамудайа̄ саддхиндрийасамудайо хоти, чхандавасена а̄ваджджанасамудайа̄ вӣрийасатисама̄дхипан̃н̃индрийасамудайо хоти. манасика̄равасена а̄ваджджанасамудайа̄ саддхиндрийасамудайо хоти. манасика̄равасена а̄ваджджанасамудайа̄ вӣрийасатисама̄дхипан̃н̃индрийасамудайо хотӣти евампи аттхо ведитаббо. имесу пат̣ипа̄т̣ийа̄ чхасу суттесу чатусаччамева катхитам̣.