6. сакун̣аггхисуттаван̣н̣ана̄

372. чхат̣т̣хе сакун̣аггхӣти сакун̣ам̣ ханатӣти сакун̣аггхи, сенассетам̣ адхивачанам̣. сахаса̄ аджджхапатта̄ти лобхаса̄хасена патта̄. алаккхика̄ти ниссирика̄. аппапун̃н̃а̄ти париттапун̃н̃а̄. сачеджджа майанти саче аджджа майам̣. нан̇галакат̣т̣хакаран̣анти нан̇галена касикаран̣ам̣, адхуна̄ кат̣т̣хам̣ кхеттат̣т̣ха̄нанти аттхо. лед̣д̣ут̣т̣ха̄нанти лед̣д̣ӯнам̣ т̣ха̄нам̣. сам̣вадама̄на̄ти самма̄ вадама̄на̄, аттано баласса сут̣т̣ху ван̣н̣ам̣ вадама̄на̄ти аттхо. махантам̣ лед̣д̣ум̣ абхирухитва̄ти уддханасан̣т̣ха̄нена т̣хитесу тӣсу лед̣д̣ӯсу ‘‘ито сене а̄гаччханте ито никкхамисса̄ми, ито а̄гаччханте ито’’ти саллаккхетва̄ тесу екам̣ лед̣д̣ум̣ абхирухитва̄ ат̣т̣ха̄си авадама̄но. саннайха̄ти кхураппам̣ саннайхама̄но вийа саннайхитва̄ сут̣т̣ху т̣хапетва̄. бахуа̄гато кхо мйа̄йанти ‘‘майхам̣ аттха̄йа айам̣ бахутам̣ т̣ха̄нам̣ а̄гато, аппам̣ авасит̣т̣хам̣, ида̄ни мам̣ ган̣хиссатӣ’’ти н̃атва̄ да̄ругул̣о вийа виниваттитва̄ тассева лед̣д̣усса антаре паччупа̄ди, пат̣ипанно павит̣т̣хоти аттхо. урам̣ паччата̄л̣есӣти ‘‘екаппаха̄ренева ла̄пасса сӣсам̣ чхиндитва̄ гахесса̄мӣ’’ти паккхандатта̄ вегам̣ сандха̄ретум̣ асакконто тасмим̣ лед̣д̣усмим̣ урам̣ пата̄л̣еси. та̄вадевасса хадайамам̣сам̣ пха̄лийиттха. атха ла̄по ‘‘дит̣т̣ха̄ вата саттуно пит̣т̣хӣ’’ти хат̣т̣хатут̣т̣хо тасса хадайе апара̄парам̣ чан̇ками.