8. а̄варан̣анӣваран̣асуттаван̣н̣ана̄

219. ат̣т̣хаме пан̃н̃а̄йа дуббалӣкаран̣а̄ти пан̃н̃а̄йа мандабха̄вакара̄. нӣваран̣а̄нан̃хи абхин̣хуппа̄де сати антарантара̄ уппаджджама̄на̄ пан̃н̃а̄ дуббала̄ хоти манда̄ ависада̄.

пан̃ча нӣваран̣а̄ тасмим̣ самайе на хонти. саттабоджджхан̇га̄ тасмим̣ самайе бха̄вана̄па̄рипӯрим̣ гаччхантӣти арийаса̄вакасса хи саппа̄йадхаммассаванам̣ сун̣антасса пан̃ча нӣваран̣а̄ дӯре хонти. со саче тасмим̣йева т̣ха̄не висесам̣ ниббаттетум̣ саккоти, евамасса сатта боджджхан̇га̄ бха̄вана̄па̄рипӯрим̣ гаччханти. но че саккоти, тато вут̣т̣ха̄йа раттит̣т̣ха̄надива̄т̣т̣ха̄нам̣ гато тамева пӣтим̣ авиджаханто пан̃ча нӣваран̣е виккхамбхетва̄ висесам̣ ниббаттессати. таттха асакконтопи йа̄ва саттадивасаббхантара̄ тамева пӣтим̣ авиджаханто нӣваран̣е виккхамбхетва̄ висесам̣ ниббаттессатӣти идам̣ сандха̄йетам̣ вуттам̣. дхаммассаванавасена саким̣ пӣтипа̄моджджапаккхийа̄ пат̣иладдхабоджджхан̇га̄ хи камма̄ра̄мата̄дӣни а̄гамма нассанти, татха̄рӯпам̣ пана утусаппа̄йа̄дим̣ лабхитва̄ пуна уппаджджанта̄пи тасмим̣ самайе бха̄вана̄па̄рипӯрим̣ гаччханти иччева вуччати.