5. папа̄тавагго

1. локачинта̄суттаван̣н̣ана̄

1111. пан̃чамасса пат̣хаме сума̄гадха̄йа поккхаран̣ийа̄ти евам̣на̄мика̄йа поккхаран̣ийа̄. локачинтам̣ чинтентоти, ‘‘кена ну кхо чандимасӯрийа̄ ката̄, кена маха̄патхавӣ, кена маха̄самуддо, кена сатта̄ уппа̄дита̄, кена паббата̄, кена амбата̄лана̄л̣икера̄дайо’’ти еварӯпам̣ локачинтам̣ чинтенто нисӣди.

вичетоти вигатачитто виккхиттачитто ва̄. бхӯтам̣йева аддаса̄ти те кира асура̄ самбарима̄йам̣ сампариваттетва̄ йатха̄ не со пурисо хаттхиасса̄дӣсу а̄руханте уккхипитва̄, бхисамул̣а̄лаччхиддехи пависанте пассати, евам̣ адхит̣т̣хахим̣су. там̣ сандха̄йа саттха̄ ‘‘бхӯтам̣йева аддаса̄’’ти а̄ха. дева̄нам̣йева мохайама̄на̄ти дева̄нам̣ читтам̣ мохайанта̄. тасма̄ти йасма̄ локачинтам̣ чинтенто умматтакопи хоти, тасма̄.

2-3. папа̄тасутта̄диван̣н̣ана̄

1112-13. дутийе пат̣ибха̄накӯт̣оти еко маханто паббатасадисо марийа̄дапа̄са̄н̣о. татийе анит̣т̣харӯпанти анит̣т̣хасабха̄вам̣.

4. кӯт̣а̄га̄расуттаван̣н̣ана̄

1114. чатуттхе хет̣т̣химам̣ гхарам̣ акаритва̄ти тхамбхабхиттипа̄дусса̄пана̄дина̄ гхарасса хет̣т̣химабха̄гам̣ акатва̄.

5. ва̄ласуттаван̣н̣ана̄

1115. пан̃чаме сантха̄га̄рети сиппугган̣ханаса̄ла̄йам̣. упа̄санам̣ каронтети кан̣д̣акхипанасиппам̣ каронте. асанам̣ атипа̄тентети кан̣д̣ам̣ атиккаменте. пон̇кха̄нупон̇кханти екам̣ кан̣д̣ам̣ кхипитва̄ йатха̄ асса сарасса пон̇кхам̣ виджджхати, апарам̣ анупон̇кхам̣ на̄ма дутийасса пон̇кхам̣, пуна апарам̣ тасса пон̇кханти евам̣ атипа̄тенте аддаса. йатра хи на̄ма̄ти йе на̄ма. дурабхисамбхаватаранти дуккаратарам̣. саттадха̄ бхиннасса ва̄ласса кот̣ийа̄ кот̣им̣ пат̣ивиджджхеййа̄ти екам̣ ва̄лам̣ саттадха̄ бхиндитва̄, тасса екам̣ бхедам̣ гахетва̄, ва̄тин̇ган̣амаджджхе бандхитва̄, апарам̣ бхедам̣ кан̣д̣асса аггакот̣ийам̣ бандхитва̄, усабхаматте т̣хито кан̣д̣абаддха̄йа кот̣ийа̄ там̣ ва̄тин̇ган̣абаддхакот̣им̣ пат̣ивиджджхеййа̄ти аттхо. тасма̄ти йасма̄ евам̣ дуппат̣ивиджджха̄ни чатта̄ри сачча̄ни, тасма̄.

7. пат̣хамачхиггал̣айугасуттаван̣н̣ана̄

1117. саттаме ан̃н̃аман̃н̃акха̄дика̄ти ан̃н̃аман̃н̃ам̣ кха̄данам̣. дуббалакха̄дика̄ти балавантехи маччха̄дӣхи дуббала̄нам̣ маччха̄дӣнам̣ кха̄данам̣.

8. дутийачхиггал̣айугасуттаван̣н̣ана̄

1118. ат̣т̣хаме маха̄патхавӣти чаккава̄л̣агаббхантара̄ маха̄патхавӣ. адхиччамидам̣, бхантети идам̣ адхиччуппаттикам̣ саче там̣ йугам̣ на пӯти бхавеййа, самудде удакам̣ на суссеййа, со ча каччхапо на мареййа, апи на̄ма йадиччха̄васена сийа̄ти аттхо.

евам̣ адхиччамидам̣, бхиккхавети еттха маха̄сӣваттхеро чатта̄ри йуга̄ни дассети – пураттхимачаккава̄л̣амукхават̣т̣ийам̣ т̣хитена пурисена паккхиттайугасса хи чхиггал̣ена тасса андхакаччхапасса гӣва̄йа павесанам̣ вийа мануссапат̣ила̄бхо адхиччапат̣ила̄бхӣ. даккхин̣ачаккава̄л̣амукхават̣т̣ийам̣ т̣хитена паккхиттасса пана париббхамантасса пуримайугам̣ патва̄ чхиггал̣ена чхиггал̣упари а̄рул̣хасса чхиггал̣ена гӣваппавесанам̣ вийа татха̄гатуппа̄до адхиччатарасамбхаво. паччхимачаккава̄л̣амукхават̣т̣ийам̣ т̣хитена паккхиттасса пана париббхамантасса пуримайугадвайам̣ патва̄ чхиггал̣ена чхиггал̣упари а̄рул̣хасса чхиггал̣ена гӣваппавесанам̣ вийа татха̄гатаппаведитасса дхаммавинайасса дӣпанам̣ адхиччатарасамбхавам̣. уттарачаккава̄л̣амукхават̣т̣ийам̣ т̣хитена паккхиттасса пана париббхамантасса пуримайугаттайам̣ патва̄ чхиггал̣ена чхиггал̣упари а̄рул̣хасса чхиггал̣ена гӣваппавесанам̣ вийа чатусаччапат̣иведхо ативийа адхиччатарасамбхаво ведитаббо. навама̄дӣни абхисамайасам̣йутте вуттанайа̄нева̄ти.

папа̄тавагго пан̃чамо.