3. дхаммадиннасуттаван̣н̣ана̄

1049. татийе дхаммадинноти саттасу джанесу еко. буддхака̄ласмин̃хи дхаммадинно упа̄сако, виса̄кхо упа̄сако, угго гахапати, читто гахапати, хаттхако а̄л̣авако, чӯл̣аана̄тхапин̣д̣ико, маха̄ана̄тхапин̣д̣икоти име сатта джана̄ пан̃часатаупа̄сакапарива̄ра̄ ахесум̣. етесу еса ан̃н̃атаро.

гамбхӣра̄ти дхаммагамбхӣра̄ салласутта̄дайо. гамбхӣраттха̄ти аттхагамбхӣра̄ четана̄суттанта̄дайо. локуттара̄ти локуттараттхадӣпака̄ асан̇кхатасам̣йутта̄дайо. сун̃н̃атаппат̣исам̣йутта̄ти саттасун̃н̃ата̄дӣпака̄ кхаджджаникасуттанта̄дайо. упасампаджджа вихарисса̄ма̄ти пат̣илабхитва̄ вихарисса̄ма. еван̃хи во, дхаммадинна, сиккхитаббанти евам̣ тумхехи чандопамапат̣ипадам̣ ратхавинӣтапат̣ипадам̣ монеййапат̣ипадам̣ маха̄арийавам̣сапат̣ипадам̣ пӯрентехи сиккхитаббам̣. ити саттха̄ имесам̣ упа̄сака̄нам̣ асайхабха̄рам̣ а̄ропеси. касма̄? ете кира на аттано бхӯмийам̣ т̣хатва̄ ова̄дам̣ йа̄чим̣су, ависесена пана саббабха̄рам̣ уккхипитум̣ саматтха̄ вийа ‘‘овадату но, бханте, бхагава̄’’ти йа̄чим̣су. тена тесам̣ саттха̄ асайхабха̄рам̣ а̄ропенто евама̄ха. на кхо нетанти на кхо етам̣. нака̄ро панеттха бйан̃джанасандхиматтамева̄ти ведитаббо. тасма̄ти йасма̄ ида̄ни аттано бхӯмийам̣ т̣хатва̄ ова̄дам̣ йа̄чатха, тасма̄.