10. ман̣ичӯл̣акасуттаван̣н̣ана̄

362. дасаме там̣ парисам̣ етадавоча̄ти тасса кира евам̣ ахоси ‘‘кулапутта̄ паббаджанта̄ путтада̄ран̃чева джа̄тарӯпараджатан̃ча паха̄йева паббаджанти, на ча сакка̄ йам̣ паха̄йа паббаджита̄, там̣ техи гахету’’нти найагга̄хе т̣хатва̄ ‘‘ма̄ аййо’’тиа̄дивачанам̣ авоча. екам̣сенетанти етам̣ пан̃чака̄магун̣акаппанам̣ ассаман̣адхаммо асакйапуттийадхаммоти екам̣сена дха̄реййа̄си.

тин̣анти сена̄саначчхаданатин̣ам̣. парийеситаббанти тин̣аччхадане ва̄ ит̣т̣хакаччхадане ва̄ гехе палуджджанте йехи там̣ ка̄ритам̣, тесам̣ сантикам̣ гантва̄ ‘‘тумхехи ка̄ритасена̄санам̣ овассати, на сакка̄ таттха васиту’’нти а̄чиккхитаббам̣. манусса̄ сакконта̄ кариссанти, асакконта̄ ‘‘тумхе вад̣д̣хаким̣ гахетва̄ ка̄ра̄петха, майам̣ те сан̃н̃а̄песса̄ма̄’’ти ваккханти. евам̣ вутте ка̄ретва̄ тесам̣ а̄чиккхитаббам̣. манусса̄ вад̣д̣хакӣнам̣ да̄таббам̣ дассанти. саче а̄ва̄саса̄мика̄ наттхи, ан̃н̃есампи бхиккха̄ча̄раваттена а̄рочетва̄ ка̄ретум̣ ват̣т̣ати. идам̣ сандха̄йа ‘‘парийеситабба’’нти вуттам̣.

да̄рунти сена̄сане гопа̄насиа̄дӣсу палуджджама̄несу тадаттха̄йа да̄рум̣. сакат̣анти гихивикатам̣ катва̄ та̄вака̄ликасакат̣ам̣. на кевалан̃ча сакат̣амева, ан̃н̃ампи ва̄сипхарасукудда̄ла̄диупакаран̣ам̣ евам̣ парийеситум̣ ват̣т̣ати. пурисоти хаттхакаммавасена пурисо парийеситаббо. йам̣кин̃чи хи пурисам̣ ‘‘хаттхакаммам̣, а̄вусо, катва̄ дассасӣ’’ти ватва̄ ‘‘дасса̄ми, бханте,’’ти вутте ‘‘идан̃чидан̃ча карохӣ’’ти йам̣ иччхати, там̣ ка̄ретум̣ ват̣т̣ати. на твева̄хам̣, га̄ман̣и, кеначи парийа̄йена̄ти джа̄тарӯпараджатам̣ пана̄хам̣ кеначипи ка̄ран̣ена парийеситаббанти на вада̄ми.