4. махакапа̄т̣иха̄рийасуттаван̣н̣ана̄

346. чатуттхе сесакам̣ виссаджджетха̄ти тасса кира тхерехи саддхим̣йева кам̣сатха̄лам̣ памаджджитва̄ па̄йа̄сам̣ вад̣д̣хетва̄ адам̣су. со бхуттапа̄йа̄со тхерехийева саддхим̣ гантука̄мо чинтеси ‘‘гхаре та̄ва упа̄сика̄ сесакам̣ вича̄рети, идха паниме да̄сакаммака̄ра̄ майа̄ авутта̄ на вича̄рессанти, ева̄йам̣ пан̣ӣтапа̄йа̄со нассиссатӣ’’ти тесам̣ ануджа̄нанто евама̄ха. кутхитанти кудхитам̣, хет̣т̣ха̄ сантатта̄йа ва̄лика̄йа упари а̄тапена ча атитикхин̣анти аттхо. идам̣ пана тепит̣аке буддхавачане асамбхиннападам̣. павелийама̄нена̄ти пат̣илийама̄нена са̄дху кхвасса бхантети ‘‘пха̄сувиха̄рам̣ карисса̄ми неса’’нти чинтетва̄ евама̄ха.

иддха̄бхисан̇кха̄рам̣ абхисан̇кхарӣти адхит̣т̣ха̄ниддхим̣ ака̄си. еттха ча ‘‘мандамандо сӣтакава̄то ва̄йату, аббхаман̣д̣апам̣ катва̄ дево екамекам̣ пхуса̄йатӯ’’ти евам̣ на̄на̄парикаммам̣ – ‘‘сава̄то дево вассатӯ’’ти евам̣ адхит̣т̣ха̄нам̣ екатопи хоти. ‘‘сава̄то дево вассатӯти екатопарикаммам̣, мандамандо сӣтакава̄то ва̄йату, аббхаман̣д̣апам̣ катва̄ дево екамекам̣ пхуса̄йатӯ’’ти евам̣ на̄на̄адхит̣т̣ха̄нам̣ хоти. вуттанайенева на̄на̄парикаммам̣ на̄на̄дхит̣т̣ха̄нам̣, екато парикаммам̣ екато адхит̣т̣ха̄нампи хотийева. йатха̄ татха̄ каронтасса пана па̄дакаджджха̄нато вут̣т̣ха̄йа катапарикаммасса парикамма̄нантарена махаггатаадхит̣т̣ха̄начиттенева там̣ иджджхати. ока̄сесӣти виппакири.