7. упасенаа̄сӣвисасуттаван̣н̣ана̄

69. саттаме сӣтаванети евам̣на̄маке суса̄наване. саппасон̣д̣икапаббха̄рети саппапхан̣асадисата̄йа евам̣ладдхана̄ме паббха̄ре. упасенасса̄ти дхаммасена̄патино канит̣т̣хабха̄тикаупасенаттхерасса. а̄сӣвисо патито хотӣти тхеро кира катабхаттакиччо маха̄чӣварам̣ гахетва̄ лен̣аччха̄йа̄йа мандамандена ва̄тапа̄нава̄тена бӣджийама̄но нисӣдитва̄ дупат̣т̣анива̄сане сӯчикаммам̣ кароти. тасмим̣ кхан̣е лен̣аччхадане две а̄сӣвисапотака̄ кӣл̣анти. тесу еко патитва̄ тхерасса ам̣сакӯт̣е аваттха̄си. со ча пхут̣т̣хависо хоти. тасма̄ патитат̣т̣ха̄нато пат̣т̣ха̄йа тхерасса ка̄йе дӣпасикха̄ вийа ват̣т̣им̣ парийа̄дийама̄намевасса висам̣ отин̣н̣ам̣. тхеро висасса татха̄гаманам̣ дисва̄ кин̃ча̄пи там̣ патитаматтамева йатха̄париччхедена гатам̣, аттано пана иддхибалена ‘‘айам̣ аттабха̄во лен̣е ма̄ винассатӯ’’ти адхит̣т̣хахитва̄ бхиккхӯ а̄мантеси. пура̄йам̣ ка̄йо идхева викиратӣти йа̄ва на викирати, та̄ва нам̣ бахиддха̄ нӣхаратха̄ти аттхо. ан̃н̃атхаттанти ан̃н̃атха̄бха̄вам̣. индрийа̄нам̣ ва̄ випарин̣а̄манти чаккхусота̄дӣнам̣ индрийа̄нам̣ пакативиджаханабха̄вам̣. таттхева викирӣти бахи нӣхаритва̄ т̣хапитат̣т̣ха̄не ман̃чакасмим̣йева викири.