1. пат̣хамамигаджа̄ласуттаван̣н̣ана̄

63. мигаджа̄лаваггасса пат̣хаме чаккхувин̃н̃еййа̄ти чаккхувин̃н̃а̄н̣ена пасситабба̄. сотавин̃н̃еййа̄дӣсупи есева найо. ит̣т̣ха̄ти парийит̣т̣ха̄ ва̄ хонту ма̄ ва̄, ит̣т̣ха̄рамман̣абхӯта̄ти аттхо. канта̄ти каманӣйа̄. мана̄па̄ти манавад̣д̣ханака̄. пийарӯпа̄ти пийаджа̄тика̄. ка̄мӯпасам̣хита̄ти а̄рамман̣ам̣ катва̄ уппаджджама̄нена ка̄мена упасам̣хита̄ раджанӣйа̄ти ран̃джанӣйа̄, ра̄гуппаттика̄ран̣абхӯта̄ти аттхо. нандӣти тан̣ха̄нандӣ. сам̣йоготи сам̣йоджанам̣. нандисам̣йоджанасам̣йуттоти нандӣбандханена баддхо. аран̃н̃аванапаттха̄нӣти аран̃н̃а̄ни ча ванапаттха̄ни ча. таттха кин̃ча̄пи абхидхамме ниппарийа̄йена ‘‘никкхамитва̄ бахи индакхӣла̄ саббаметам̣ аран̃н̃а’’нти (вибха. 529) вуттам̣, татха̄пи йам̣ там̣ ‘‘пан̃чадханусатикам̣ паччхима’’нти (па̄ра̄. 654) аран̃н̃акан̇ганиппха̄дакам̣ сена̄санам̣ вуттам̣, тадева адхиппетанти ведитаббам̣. ванапаттханти га̄мантам̣ атиккамитва̄ манусса̄нам̣ анупача̄рат̣т̣ха̄нам̣, йаттха на касӣйати на вапӣйати. вуттампи четам̣ –

‘‘ванапаттханти дӯра̄наметам̣ сена̄сана̄нам̣ адхивачанам̣. ванапаттханти ванасан̣д̣а̄наметам̣, ванапаттханти бхим̣санака̄наметам̣, ванапаттханти саломахам̣са̄наметам̣, ванапаттханти парийанта̄наметам̣, ванапаттханти амануссӯпача̄ра̄нам̣ сена̄сана̄наметам̣ адхивачана’’нти (вибха. 531).

еттха ча парийанта̄нанти имам̣ екам̣ парийа̄йам̣ т̣хапетва̄ сесапарийа̄йехи ванапаттха̄ни ведитабба̄ни. панта̄нӣти парийанта̄ни атидӯра̄ни. аппасадда̄нӣти удуккхаламусалада̄ракасадда̄дӣнам̣ абха̄вена аппасадда̄ни. аппаниггхоса̄нӣти тесам̣ тесам̣ нинна̄дамаха̄ниггхосасса абха̄вена аппаниггхоса̄ни. виджанава̄та̄нӣти сан̃чаран̣аджанасса сарӣрава̄тавирахита̄ни. мануссара̄хассеййака̄нӣти манусса̄нам̣ рахокаммасса ануччхавика̄ни. пат̣исалла̄наса̄руппа̄нӣти нилӣйанаса̄руппа̄ни.