1. саббасуттаван̣н̣ана̄

23. саббаваггасса пат̣хаме саббам̣ во, бхиккхавети саббам̣ на̄ма чатуббидхам̣ – саббасаббам̣, а̄йатанасаббам̣, сакка̄йасаббам̣, падесасаббанти. таттха –

‘‘на тасса аддит̣т̣хамидхааттхи кин̃чи,

атхо авин̃н̃а̄тамаджа̄нитаббам̣;

саббам̣ абхин̃н̃а̄си йадаттхи неййам̣,

татха̄гато тена самантачаккхӯ’’ти. (маха̄ни. 156; чӯл̣ани. дхотакама̄н̣авапуччха̄ниддесо 32; пат̣и. ма. 1.121) –

идам̣ саббасаббам̣ на̄ма. ‘‘саббам̣ во, бхиккхаве, десесса̄ми, там̣ сун̣а̄тха̄’’ти (сам̣. ни. 4.24) идам̣ а̄йатанасаббам̣ на̄ма. ‘‘саббадхаммамӯлапарийа̄йам̣ во, бхиккхаве, десесса̄мӣ’’ти (ма. ни. 1.1) идам̣ сакка̄йасаббам̣ на̄ма. ‘‘саббадхаммесу ва̄ пана пат̣хамасаманна̄ха̄ро уппаджджати читтам̣ мано ма̄насам̣…пе… таджджа̄манодха̄тӯ’’ти идам̣ падесасаббам̣ на̄ма. ити пан̃ча̄рамман̣аматтам̣ падесасаббам̣. тебхӯмакадхамма̄ сакка̄йасаббам̣. чатубхӯмакадхамма̄ а̄йатанасаббам̣. йам̣кин̃чи неййам̣ саббасаббам̣. падесасаббам̣ сакка̄йасаббам̣ на па̄пун̣а̄ти, сакка̄йасаббам̣ а̄йатанасаббам̣ на па̄пун̣а̄ти, а̄йатанасаббам̣ саббасаббам̣ на па̄пун̣а̄ти. касма̄? саббан̃н̃утан̃н̃а̄н̣асса айам̣ на̄ма дхаммо а̄рамман̣ам̣ на хотӣти наттхита̄йа. имасмим̣ пана сутте а̄йатанасаббам̣ адхиппетам̣.

паччаккха̄йа̄ти пат̣иккхипитва̄. ва̄ча̄ваттхукамевасса̄ти, ва̄ча̄йа ваттаббаваттхуматтакамева бхавеййа. има̄ни пана два̄даса̄йатана̄ни атиккамитва̄ айам̣ на̄ма ан̃н̃о сабха̄вадхаммо аттхӣти дассетум̣ на саккун̣еййа. пут̣т̣хо ча на сампа̄йеййа̄ти, ‘‘катамам̣ ан̃н̃ам̣ саббам̣ на̄ма̄’’ти? пуччхито, ‘‘идам̣ на̄ма̄’’ти вачанена сампа̄детум̣ на саккун̣еййа. вигха̄там̣ а̄паджджеййа̄ти дуккхам̣ а̄паджджеййа. йатха̄ там̣, бхиккхаве, ависайасминти еттха танти нипа̄таматтам̣. йатха̄ти ка̄ран̣авачанам̣, йасма̄ ависайе пут̣т̣хоти аттхо. ависайасмин̃хи сатта̄нам̣ вигха̄това хоти, кӯт̣а̄га̄раматтам̣ силам̣ сӣсена уккхипитва̄ гамбхӣре удаке таран̣ам̣ ависайо, татха̄ чандимасӯрийа̄нам̣ а̄кад̣д̣хитва̄ па̄танам̣, тасмим̣ ависайе ва̄йаманто вигха̄тамева а̄паджджати, евам̣ имасмимпи ависайе вигха̄тамева а̄паджджеййа̄ти адхиппа̄йо.