10. удакасуттаван̣н̣ана̄

103. дасаме удако суданти еттха суданти нипа̄таматтам̣. удакоти тасса на̄мам̣. идам̣ джа̄ту ведагӯти еттха иданти нипа̄таматтам̣. атха ва̄ идам̣ мама вачанам̣ сун̣а̄тха̄ти дӣпенто евама̄ха. джа̄ту ведагӯти ахам̣ екам̣сенева ведагӯ, ведасан̇кха̄тена н̃а̄н̣ена неййесу гато, ведам̣ ва̄ гато адхигато, пан̣д̣итохамасмӣти аттхо. саббаджӣти екам̣сена саббават̣т̣ам̣ джинитва̄ абхибхавитва̄ т̣хитосмӣти вадати. апаликхатам̣ ган̣д̣амӯланти апаликхатам̣ дуккхамӯлам̣. паликхан̣инти паликхатам̣ майа̄, кханитва̄ т̣хитосмӣти дӣпети.

ма̄та̄петтикасамбхавасса̄ти ма̄тито ча питито ча ниббаттена ма̄та̄петтикена суккасон̣итена самбхӯтасса. оданакумма̄сӯпачайасса̄ти оданена чева кумма̄сена ча упачитасса вад̣д̣хитасса. аниччуччха̄данапаримадданабхеданавиддхам̣санадхаммасса̄ти еттха айам̣ ка̄йо хутва̄ абха̄ват̣т̣хена аниччадхаммо, дуггандхавигха̄таттха̄йа танувилепанена уччха̄данадхаммо, ан̇гапаччан̇га̄ба̄дхавиноданаттха̄йа кхуддакасамба̄ханена паримадданадхаммо, дахарака̄ле ва̄ ӯрӯсу сайа̄петва̄ габбхава̄сена дуссан̣т̣хита̄нам̣ тесам̣ тесам̣ ан̇га̄нам̣ сан̣т̣ха̄насампа̄данаттхам̣ ан̃чханапӣл̣ана̄дӣнам̣ васена паримадданадхаммо, евам̣ парихаритопи ча бхеданавиддхам̣санадхаммо бхиджджати чева викирати ча, евам̣ сабха̄воти аттхо.

таттха ма̄та̄петтикасамбхаваоданакумма̄сӯпачайапаримадданападехи вад̣д̣хи катхита̄, аниччабхеданавиддхам̣санападехи париха̄ни. пуримехи ва̄ тӣхи самудайо, паччхимехи аттхан̇гамоти. евам̣ ча̄тумаха̄бхӯтикасса ка̄йасса вад̣д̣хипариха̄ниниббаттибхеда̄ дассита̄. сесам̣ утта̄наттхамева̄ти.

сал̣авагго дасамо.

дутийо пан̣н̣а̄сако.