4-6. гомайапин̣д̣асутта̄диван̣н̣ана̄

96-98. чатуттхе сассатисаманти синерумаха̄патхавӣчандимасӯрийа̄дӣхи сассатӣхи самам̣. париттам̣ гомайапин̣д̣анти аппаматтакам̣ мадхукапуппхаппама̄н̣ам̣ гомайакхан̣д̣ам̣. куто пана̄ненетам̣ ладдханти. парибхан̣д̣акаран̣аттха̄йа а̄бхатато гахитанти еке. аттхасса пана вин̃н̃а̄панаттхам̣ иддхийа̄ абхисан̇кхаритва̄ хаттха̄рул̣хам̣ катанти ведитаббанти. аттабха̄вапат̣ила̄бхоти пат̣иладдхааттабха̄во. на йидам̣ брахмачарийава̄со пан̃н̃а̄йетха̄ти айам̣ маггабрахмачарийава̄со на̄ма на пан̃н̃а̄йеййа. магго хи тебхӯмакасан̇кха̄ре виват̣т̣енто уппаджджати. йади ча еттако аттабха̄во ниччо бхавеййа, магго уппаджджитва̄пи сан̇кха̄рават̣т̣ам̣ виват̣т̣етум̣ на саккун̣еййа̄ти брахмачарийава̄со на пан̃н̃а̄йетха.

ида̄ни саче кочи сан̇кха̄ро ниччо бхавеййа, майа̄ маха̄судассанара̄джака̄ле анубхӯта̄ сампатти ничча̄ бхавеййа, са̄пи ча аничча̄ти там̣ дассетум̣ бхӯтапубба̄хам̣ бхиккху ра̄джа̄ ахосинтиа̄дима̄ха. таттха куса̄ватӣра̄джадха̄ниппамукха̄нӣти куса̄ватӣра̄джадха̄нӣ тесам̣ нагара̄нам̣ памукха̄, саббасет̣т̣ха̄ти аттхо. са̄рамайа̄нӣти раттачанданаса̄рамайа̄ни. упадха̄нам̣ пана саббесам̣ суттамайамева. гон̣акаттхата̄нӣти чатуран̇гула̄дхикаломена ка̄л̣акоджавена аттхата̄ни, йам̣ маха̄пит̣т̣хийакоджавоти ваданти. пат̣акаттхата̄нӣти убхатоломена ун̣н̣а̄майена сетакамбалена аттхата̄ни. пат̣аликаттхата̄нӣти гханапуппхена ун̣н̣а̄майааттхаран̣ена аттхата̄ни. кадалимигапаварапаччаттхаран̣а̄нӣти кадалимигачаммамайена уттамапаччаттхаран̣ена аттхата̄ни. там̣ кира паччаттхаран̣ам̣ сетаваттхасса упари кадалимигачаммам̣ аттхаритва̄ сиббетва̄ каронти. сауттараччхада̄нӣти саха уттараччхадена, упари баддхена раттавита̄нена саддхинти аттхо. убхатолохитакӯпадха̄нӣти сӣсӯпадха̄нан̃ча па̄дӯпадха̄нан̃ча̄ти паллан̇ка̄нам̣ убхатолохитакӯпадха̄на̄ни. веджайантаратхаппамукха̄нӣти еттха веджайанто на̄ма тасса ран̃н̃о ратхо, йасса чакка̄нам̣ инданӣламан̣имайа̄ на̄бхи, саттаратанамайа̄ ара̄, пава̄л̣амайа̄ неми, раджатамайо аккхо, инданӣламан̣имайам̣ упаккхарам̣, раджатамайам̣ куббарам̣. со тесам̣ ратха̄нам̣ памукхо агго. дукӯласанда̄на̄нӣти дукӯласантхара̄ни. кам̣сӯпадха̄ран̣а̄нӣти раджатамайадохабха̄джана̄ни. ваттхакот̣исахасса̄нӣти йатха̄ручитам̣ парибхун̃джиссатӣти нхатва̄ т̣хитака̄ле упанӣтаваттха̄нева сандха̄йетам̣ вуттам̣. бхатта̄бхиха̄роти абхихаритаббабхаттам̣.

йамахам̣ тена самайена аджджха̄васа̄мӣти йаттха васа̄ми, там̣ екан̃н̃ева нагарам̣ хоти, авасесесу путтадхӣта̄дайо чева да̄саманусса̄ ча васим̣су. па̄са̄дакӯт̣а̄га̄ра̄дӣсупи есева найо. паллан̇ка̄дӣсу екам̣йева сайам̣ парибхун̃джати, сеса̄ путта̄дӣнам̣ парибхога̄ хонти. иттхӣсу ека̄ва паччупат̣т̣ха̄ти, сеса̄ парива̄раматта̄ хонти. вела̄мика̄ти кхаттийасса ва̄ бра̄хман̣ийа̄, бра̄хман̣асса ва̄ кхаттийа̄нийа̄ куччхисмим̣ джа̄та̄. паридаха̄мӣти екам̣йева дуссайугам̣ нива̄семи, сеса̄ни парива̄ретва̄ вичаранта̄нам̣ асӣтисахасса̄дхика̄нам̣ сол̣асаннам̣ пурисасатасахасса̄нам̣ хонтӣти дассети. бхун̃джа̄мӣти парамаппама̄н̣ена на̄л̣икоданаматтам̣ бхун̃джа̄ми, сесам̣ парива̄ретва̄ вичаранта̄нам̣ чатта̄лӣсасахасса̄дхика̄нам̣ ат̣т̣ханнам̣ пурисасатасахасса̄нам̣ хотӣти дассети. екатха̄липа̄ко хи дасаннам̣ джана̄нам̣ пахоти.

ити имам̣ маха̄судассанака̄ле сампаттим̣ дассетва̄ ида̄ни тасса̄ аниччатам̣ дассенто ити кхо бхиккхӯтиа̄дима̄ха. таттха випарин̣ата̄ти пакатиджаханена ниббутападӣпо вийа апан̣н̣аттикабха̄вам̣ гата̄. евам̣ аничча̄ кхо бхиккху сан̇кха̄ра̄ти евам̣ хутва̄абха̄ват̣т̣хена аничча̄. етта̄вата̄ бхагава̄ йатха̄ на̄ма пурисо сатахаттхуббедхе чампакаруккхе ниссен̣им̣ бандхитва̄ абхирухитва̄ чампакапуппхам̣ а̄да̄йа ниссен̣им̣ мун̃чанто отареййа, евамевам̣ ниссен̣им̣ бандханто вийа анекавассакот̣исатасахассуббедхам̣ маха̄судассанасампаттим̣ а̄руйха сампаттиматтхаке т̣хитам̣ аниччалаккхан̣ам̣ а̄да̄йа ниссен̣им̣ мун̃чанто вийа отин̣н̣о. евам̣ аддхува̄ти евам̣ удакапуббул̣а̄дайо вийа дхувабха̄варахита̄. евам̣ анасса̄сика̄ти евам̣ супинаке пӣтапа̄нӣйам̣ вийа анулиттачанданам̣ вийа ча асса̄савирахита̄. ити имасмим̣ сутте аниччалаккхан̣ам̣ катхитам̣. пан̃чаме саббам̣ вуттанайамева. чхат̣т̣хам̣ татха̄ буджджханакасса аджджха̄сайена вуттам̣. чатуттха̄дӣни.