1. надӣсуттаван̣н̣ана̄

93. пуппхаваггасса пат̣хаме паббатеййа̄ти паббате паватта̄. оха̄ринӣти соте патитапатита̄ни тин̣апан̣н̣акат̣т̣ха̄дӣни хет̣т̣ха̄ха̄ринӣ. дӯран̇гама̄ти никкхантат̣т̣ха̄нато пат̣т̣ха̄йа чатупан̃чайоджанасатага̄минӣ. сӣгхасота̄ти чан̣д̣асота̄. ка̄са̄тиа̄дӣни сабба̄ни тин̣аджа̄та̄ни. руккха̄ти еран̣д̣а̄дайо дуббаларуккха̄. те нам̣ аджджхоламбеййунти те тӣре джа̄та̄пи онамитва̄ аггехи удакам̣ пхусантехи адхиоламбеййум̣, упари ламбеййунти аттхо. палуджджеййунти самӯламаттика̄йа саддхим̣ сӣсе патеййум̣. со техи аджджхоттхат̣о ва̄лукаматтикодакехи мукхам̣ пависантехи маха̄вина̄сам̣ па̄пун̣еййа.

евамева кхоти еттха соте патитапурисо вийа ват̣т̣асанниссито ба̄лапутхуджджано дат̣т̣хаббо, убхатотӣре ка̄са̄дайо вийа дуббалапан̃чаккхандха̄, ‘‘име гахита̄пи мам̣ та̄ретум̣ на саккхиссантӣ’’ти тасса пурисасса аджа̄нитва̄ гахан̣ам̣ вийа име кхандха̄ ‘‘на майхам̣ саха̄йа̄’’ти ба̄лапутхуджджанасса аджа̄нитва̄ чатӯхи га̄хехи гахан̣ам̣, гахитагахита̄нам̣ палуджджанатта̄ пурисасса бйасанаппатти вийа чатӯхи га̄хехи гахита̄нам̣ кхандха̄нам̣ випарин̣а̄ме ба̄лапутхуджджанасса сока̄дибйасанаппатти ведитабба̄. пат̣хамам̣.