2. дутийавагго

1. дуггатасуттаван̣н̣ана̄

134. дутийаваггасса пат̣хаме дуггатанти далиддам̣ капан̣ам̣. дурӯпетанти дуссан̣т̣ха̄нехи хаттхапа̄дехи упетам̣. пат̣хамам̣.

2. сукхитасуттаван̣н̣ана̄

135. дутийе сукхитанти сукхасамаппитам̣ махаддханам̣ маха̄бхогам̣. сусаджджитанти алан̇катапат̣ийаттам̣ хаттхиккхандхагатам̣ маха̄парива̄рам̣. дутийам̣.

3. тим̣саматтасуттаван̣н̣ана̄

136. татийе па̄веййака̄ти па̄веййадесава̄сино. саббе а̄ран̃н̃ика̄тиа̄дӣсу дхутан̇гасама̄да̄навасена тесам̣ а̄ран̃н̃ика̄дибха̄во ведитаббо. саббе сасам̣йоджана̄ти саббе сабандхана̄, кечи сота̄панна̄, кечи сакада̄га̄мино, кечи ана̄га̄мино. тесу хи путхуджджано ва̄ кхӣн̣а̄саво ва̄ наттхи. гуннантиа̄дӣсу сетака̄л̣а̄диван̣н̣есу екекаван̣н̣ака̄лова гахетаббо. па̄рипантхака̄ти парипантхе тит̣т̣ханака̄ пантхагха̄тачора̄. па̄рада̄рика̄ти парада̄рача̄риттам̣ а̄паджджанака̄. татийам̣.

4-9. ма̄тусутта̄диван̣н̣ана̄

137-142. чатуттха̄дӣсу лин̇ганийамена чева чаккава̄л̣анийамена ча аттхо ведитаббо. пуриса̄нан̃хи ма̄туга̄мака̄ло, ма̄туга̄ма̄нан̃ча пурисака̄лоти еваметтха лин̇ганийамо. имамха̄ чаккава̄л̣а̄ сатта̄ парачаккава̄л̣ам̣, парачаккава̄л̣а̄ ча имам̣ чаккава̄л̣ам̣ сам̣саранти. тесу имасмим̣ чаккава̄л̣е ма̄туга̄мака̄ле ма̄тубхӯтан̃н̃ева дассенто йо нама̄та̄бхӯтапубботи а̄ха. йо напита̄бхӯтапубботиа̄дӣсупи есева найо. чатуттха̄дӣни.

10. вепуллапаббатасуттаван̣н̣ана̄

143. дасаме бхӯтапуббанти атӣтака̄ле екам̣ апада̄нам̣ а̄харитва̄ дассети. саман̃н̃а̄ удапа̄дӣти пан̃н̃атти ахоси. чатӯхена а̄рохантӣти идам̣ тха̄мамаджджхиме сандха̄йа вуттам̣. агганти уттамам̣. бхаддайуганти сундарайугалам̣. тӣхена а̄рохантӣти етта̄вата̄ кира двиннам̣ буддха̄нам̣ антаре йоджанам̣ патхавӣ уссанна̄, со паббато тийоджануббедхо джа̄то.

аппам̣ ва̄ бхиййоти вассасатато уттарим̣ аппам̣ даса ва̄ вӣсам̣ ва̄ васса̄ни. пуна вассасатамева джӣванако на̄ма наттхи, уттамакот̣ийа̄ пана сат̣т̣хи ва̄ асӣти ва̄ васса̄ни джӣванти. вассасатам̣ пана аппатва̄ пан̃чавассадасавасса̄дика̄ле мӣйама̄на̄ва бахука̄. еттха ча какусандхо бхагава̄ чатта̄лӣсавассасахасса̄йукака̄ле, кон̣а̄гамано тим̣савассасахасса̄йукака̄ле ниббаттоти идам̣ анупуббена парихӣнасадисам̣ катам̣, на пана евам̣ парихӣнам̣, вад̣д̣хитва̄ вад̣д̣хитва̄ парихӣнанти ведитаббам̣. катхам̣? какусандхо та̄ва бхагава̄ имасмим̣йева каппе чатта̄лӣсавассасахасса̄йукака̄ле ниббатто а̄йуппама̄н̣ам̣ пан̃ча кот̣т̣ха̄се катва̄ чатта̄ро т̣хатва̄ пан̃чаме виджджама̄нейева париниббуто. там̣ а̄йу париха̄йама̄нам̣ дасавассака̄лам̣ патва̄ пуна вад̣д̣хама̄нам̣ асан̇кхеййам̣ хутва̄ тато париха̄йама̄нам̣ тим̣савассасахасса̄йукака̄ле т̣хитам̣, тада̄ кон̣а̄гамано ниббатто. тасмимпи татхева париниббуте там̣ а̄йу дасавассака̄лам̣ патва̄ пуна вад̣д̣хама̄нам̣ асан̇кхеййам̣ хутва̄ париха̄йитва̄ вӣсавассасахассака̄ле т̣хитам̣, тада̄ кассапо бхагава̄ ниббатто. тасмимпи татхева париниббуте там̣ а̄йу дасавассака̄лам̣ патва̄ пуна вад̣д̣хама̄нам̣ асан̇кхеййам̣ хутва̄ париха̄йитва̄ вассасатака̄лам̣ паттам̣, атха амха̄кам̣ самма̄самбуддхо ниббатто. евам̣ анупуббена париха̄йитва̄ вад̣д̣хитва̄ вад̣д̣хитва̄ парихӣнанти ведитаббам̣. таттха ча йам̣ а̄йупарима̄н̣есу мандесу буддха̄ ниббаттанти, тесампи тадева а̄йупарима̄н̣ам̣ хотӣти. дасамам̣.

дутийо вагго.

анаматаггасам̣йуттаван̣н̣ана̄ нит̣т̣хита̄.