5. чан̇камасуттаван̣н̣ана̄

99. пан̃чаме пассатха ноти пассатха ну. саббе кхо етети са̄рипуттаттхеро бхагавата̄ ‘‘етадаггам̣, бхиккхаве, мама са̄вака̄нам̣ бхиккхӯнам̣ маха̄пан̃н̃а̄нам̣ йадидам̣ са̄рипутто’’ти (а. ни. 1.189) маха̄пан̃н̃есу етадагге т̣хапито. ити нам̣ ‘‘кхандхантарам̣ дха̄твантарам̣ а̄йатанантарам̣ сатипат̣т̣ха̄набодхипаккхийадхаммантарам̣ тилаккхан̣а̄хатам̣ гамбхӣрам̣ пан̃хам̣ пуччхисса̄ма̄’’ти маха̄пан̃н̃а̄ва парива̄ренти. сопи тесам̣ патхавим̣ паттхаренто вийа синерупа̄дато ва̄ликам̣ уддхаранто вийа чаккава̄л̣апаббатам̣ бхинданто вийа синерум̣ уккхипанто вийа а̄ка̄сам̣ виттха̄ренто вийа чандимасӯрийе ут̣т̣ха̄пенто вийа ча пуччхитапуччхитам̣ катхети. тена вуттам̣ ‘‘саббе кхо ете, бхиккхаве, бхиккхӯ маха̄пан̃н̃а̄’’ти.

маха̄моггалла̄нопи бхагавата̄ ‘‘етадаггам̣, бхиккхаве, мама са̄вака̄нам̣ бхиккхӯнам̣ иддхиманта̄нам̣ йадидам̣ маха̄моггалла̄но’’ти иддхимантесу етадагге т̣хапито. ити нам̣ ‘‘парикаммам̣ а̄нисам̣сам̣ адхит̣т̣ха̄нам̣ викуббанам̣ пуччхисса̄ма̄’’ти иддхимантова парива̄ренти. сопи тесам̣ вуттанайенева пуччхитапуччхитам̣ катхети. тена вуттам̣ ‘‘саббе кхо ете, бхиккхаве, бхиккхӯ махиддхика̄’’ти.

маха̄кассапопи бхагавата̄ ‘‘етадаггам̣, бхиккхаве, мама са̄вака̄нам̣ бхиккхӯнам̣ дхутава̄да̄нам̣ йадидам̣ маха̄кассапо’’ти дхутава̄десу етадагге т̣хапито. ити нам̣ ‘‘дхутан̇гапариха̄рам̣ а̄нисам̣сам̣ самодха̄нам̣ адхит̣т̣ха̄нам̣ бхедам̣ пуччхисса̄ма̄’’ти дхутава̄да̄ва парива̄ренти. сопи тесам̣ татхева пуччхитапуччхитам̣ бйа̄кароти. тена вуттам̣ ‘‘саббе кхо ете, бхиккхаве, бхиккхӯ дхутава̄да̄’’ти.

ануруддхаттхеропи бхагавата̄ ‘‘етадаггам̣, бхиккхаве, мама са̄вака̄нам̣ бхиккхӯнам̣ диббачаккхука̄нам̣ йадидам̣ ануруддхо’’ти (а. ни. 1.192) диббачаккхукесу етадагге т̣хапито. ити нам̣ ‘‘диббачаккхусса парикаммам̣ а̄нисам̣сам̣ упаккилесам̣ пуччхисса̄ма̄’’ти диббачаккхука̄ва парива̄ренти. сопи тесам̣ татхева пуччхитапуччхитам̣ катхети. тена вуттам̣ ‘‘саббе кхо ете, бхиккхаве, бхиккхӯ диббачаккхука̄’’ти.

пун̣н̣аттхеропи бхагавата̄ ‘‘етадаггам̣, бхиккхаве, мама са̄вака̄нам̣ бхиккхӯнам̣ дхаммакатхика̄нам̣ йадидам̣ пун̣н̣о манта̄н̣ипутто’’ти (а. ни. 1.196) дхаммакатхикесу етадагге т̣хапито. ити нам̣ ‘‘дхаммакатха̄йа сан̇кхепавиттха̄рагамбхӣрутта̄навичитракатха̄дӣсу там̣ там̣ а̄ка̄рам̣ пуччхисса̄ма̄’’ти дхаммакатхика̄ва парива̄ренти. сопи тесам̣ ‘‘а̄вусо, дхаммакатхикена на̄ма а̄дито парисам̣ ван̣н̣етум̣ ват̣т̣ати, маджджхе сун̃н̃атам̣ пака̄сетум̣, анте чатусаччавасена кӯт̣ам̣ ган̣хиту’’нти евам̣ там̣ там̣ дхаммакатха̄найам̣ а̄чиккхати. тена вуттам̣ ‘‘саббе кхо ете, бхиккхаве, бхиккхӯ дхаммакатхика̄’’ти.

упа̄литтхеропи бхагавата̄ ‘‘етадаггам̣, бхиккхаве, мама са̄вака̄нам̣ бхиккхӯнам̣ винайадхара̄нам̣ йадидам̣ упа̄лӣ’’ти (а. ни. 1.228) винайадхаресу етадагге т̣хапито. ити нам̣ ‘‘гарукалахукам̣ сатекиччхаатекиччхам̣ а̄патта̄на̄паттим̣ пуччхисса̄ма̄’’ти винайадхара̄ва парива̄ренти. сопи тесам̣ пуччхитапуччхитам̣ татхева катхети. тена вуттам̣ ‘‘саббе кхо ете, бхиккхаве, бхиккхӯ винайадхара̄’’ти.

а̄нандаттхеропи бхагавата̄ ‘‘етадаггам̣, бхиккхаве, мама са̄вака̄нам̣ бхиккхӯнам̣ бахуссута̄нам̣ йадидам̣ а̄нандо’’ти (а. ни. 1.223) бахуссутесу етадагге т̣хапито. ити нам̣ ‘‘дасавидхам̣ бйан̃джанабуддхим̣ ат̣т̣хуппаттим̣ анусандхим̣ пубба̄парам̣ пуччхисса̄ма̄’’ти бахуссута̄ва парива̄ренти. сопи тесам̣ ‘‘идам̣ евам̣ ваттаббам̣, идам̣ евам̣ гахетабба’’нти саббам̣ катхети. тена вуттам̣ ‘‘саббе кхо ете, бхиккхаве, бхиккхӯ бахуссута̄’’ти.

девадатто пана па̄пиччхо иччха̄пакато, тена нам̣ ‘‘куласан̇ган̣ханапариха̄рам̣ на̄наппака̄ракам̣ кохан̃н̃атам̣ пуччхисса̄ма̄’’ти па̄пиччха̄ва парива̄ренти. сопи тесам̣ там̣ там̣ нийа̄мам̣ а̄чиккхати. тена вуттам̣ ‘‘саббе кхо ете, бхиккхаве, бхиккхӯ па̄пиччха̄’’ти.

касма̄ панете авидӯре чан̇камим̣сӯти. ‘‘девадатто саттхари падут̣т̣хачитто анаттхампи ка̄тум̣ упаккамеййа̄’’ти а̄раккхаггахан̣аттхам̣. атха девадатто касма̄ чан̇камӣти? ‘‘ака̄рако айам̣, йади ка̄рако бхавеййа, на идха а̄гаччхеййа̄’’ти аттано катадосапат̣иччха̄данаттхам̣. ким̣ пана девадатто бхагавато анаттхам̣ ка̄тум̣ саматтхо, бхагавато ва̄ а̄раккхакиччам̣ аттхӣти? наттхи. тена вуттам̣ ‘‘ат̣т̣ха̄наметам̣, а̄нанда, анавака̄со, йам̣ татха̄гато парӯпаккамена паринибба̄йеййа̄’’ти (чӯл̣ава. 341). бхиккхӯ пана саттхари га̄равена а̄гата̄. тенева бхагава̄ евам̣ ватва̄ ‘‘виссаджджехи, а̄нанда, бхиккхусан̇гха’’нти виссаджджа̄песи. пан̃чамам̣.