5. н̃а̄тикасуттаван̣н̣ана̄

45. пан̃чаме н̃а̄тикети двиннам̣ н̃а̄така̄нам̣ га̄ме. гин̃джака̄васатхети ит̣т̣хака̄хи кате маха̄па̄са̄де. дхаммапарийа̄йанти дхаммака̄ран̣ам̣. упассутӣти упассутит̣т̣ха̄нам̣, йам̣ т̣ха̄нам̣ упагатена сакка̄ хоти бхагавато саддам̣ сотум̣, таттха т̣хитоти аттхо. со кира гандхакут̣ипаривен̣асаммаджджанаттхам̣ а̄гато аттано каммам̣ паха̄йа бхагавато дхаммагхосам̣ сун̣анто ат̣т̣ха̄си. аддаса̄ти тада̄ кира бхагавато а̄дитова паччайа̄ка̄рам̣ манасикаронтасса ‘‘идам̣ имина̄ паччайена хоти, идам̣ имина̄’’ти а̄ваджджато йа̄ва бхавагга̄ екан̇ган̣ам̣ ахоси, саттха̄ манасика̄рам̣ паха̄йа вачаса̄ саджджха̄йам̣ каронто йатха̄нусандхина̄ десанам̣ нит̣т̣хапетва̄, ‘‘апи ну кхо имам̣ дхаммапарийа̄йам̣ кочи ассосӣ’’ти а̄вадждженто там̣ бхиккхумаддаса. тена вуттам̣ ‘‘аддаса̄ кхо бхагава̄’’ти.

ассоси ноти ассоси ну. атха ва̄ ассоси ноти амха̄кам̣ бха̄санта̄нам̣ ассосӣти. угган̣ха̄хӣтиа̄дӣсу сутва̄ тун̣хӣбхӯтова пагун̣ам̣ каронто угган̣ха̄ти на̄ма. пада̄нупадам̣ гхат̣етва̄ ва̄ча̄йа паричитам̣ каронто парийа̄пун̣а̄ти на̄ма. убхайатха̄пи пагун̣ам̣ а̄дха̄раппаттам̣ каронто дха̄рети на̄ма. аттхасам̣хитоти ка̄ран̣аниссито. а̄дибрахмачарийакоти маггабрахмачарийасса а̄ди патит̣т̣ха̄набхӯто. ити тӣсупи имесу суттесу ват̣т̣авиват̣т̣амева катхитам̣. пан̃чамам̣.