5. авиджджа̄паччайасуттаван̣н̣ана̄

35. пан̃чаме самудайо хотӣти саттха̄ идхева десанам̣ оса̄песи. ким̣ка̄ран̣а̄ти? дит̣т̣хигатикасса ока̄сада̄наттхам̣. тассан̃хи парисати упа̄рамбхачитто дит̣т̣хигатико аттхи, со пан̃хам̣ пуччхиссати, атхасса̄хам̣ виссаджджесса̄мӣти тасса ока̄сада̄наттхам̣ десанам̣ оса̄песи. но калло пан̃хоти айутто пан̃хо. дуппан̃хо есоти аттхо. нану ча ‘‘катамам̣ ну кхо, бханте, джара̄маран̣а’’нти? идам̣ супуччхитанти. кин̃ча̄пи супуччхитам̣, йатха̄ пана сатасахассаггханике суван̣н̣атха̄ле вад̣д̣хитасса субходжанасса маттхаке а̄малакаматтепи гӯтхапин̣д̣е т̣хапите саббам̣ бходжанам̣ дуббходжанам̣ хоти чхад̣д̣етаббам̣, евамева ‘‘касса ча панидам̣ джара̄маран̣а’’нти? имина̄ саттӯпаладдхива̄дападена гӯтхапин̣д̣ена там̣ бходжанам̣ дуббходжанам̣ вийа айампи саббо дуппан̃хова джа̄тоти.

брахмачарийава̄соти арийамаггава̄со. там̣ джӣвам̣ там̣ сарӣранти йасса хи айам̣ дит̣т̣хи, со ‘‘джӣве уччхиджджама̄не сарӣрам̣ уччхиджджати, сарӣре уччхиджджанте джӣвитам̣ уччхиджджатӣ’’ти ган̣ха̄ти. евам̣ ган̣хато са̄ дит̣т̣хи ‘‘сатто уччхиджджатӣ’’ти гахитатта̄ уччхедадит̣т̣хи на̄ма хоти. саче пана сан̇кха̄ра̄ва уппаджджанти чева нируджджханти ча̄ти ган̣хеййа, са̄сана̄вачара̄ самма̄дит̣т̣хи на̄ма бхавеййа. арийамагго ча на̄месо ват̣т̣ам̣ ниродхенто ват̣т̣ам̣ самуччхинданто уппаджджати, тадева там̣ ват̣т̣ам̣ уччхедадит̣т̣хийа̄ гахита̄ка̄расса самбхаве сати вина̄ва маггабха̄вана̄йа нируджджхатӣти маггабха̄вана̄ нираттхака̄ хоти. тена вуттам̣ ‘‘брахмачарийава̄со на хотӣ’’ти.

дутийанайе ан̃н̃ам̣ джӣвам̣ ан̃н̃ам̣ сарӣранти йасса айам̣ дит̣т̣хи, со ‘‘сарӣрам̣ идхева уччхиджджати, на джӣвитам̣, джӣвитам̣ пана пан̃джарато сакун̣о вийа йатха̄сукхам̣ гаччхатӣ’’ти ган̣ха̄ти. евам̣ ган̣хато са̄ дит̣т̣хи ‘‘имасма̄ лока̄ джӣвитам̣ паралокам̣ гата’’нти гахитатта̄ сассатадит̣т̣хи на̄ма хоти. айан̃ча арийамагго тебхӯмакават̣т̣ам̣ виват̣т̣енто уппаджджати, со екасан̇кха̄репи ничче дхуве сассате сати уппаннопи ват̣т̣ам̣ виват̣т̣етум̣ на саккотӣти маггабха̄вана̄ нираттхака̄ хоти. тена вуттам̣ ‘‘ан̃н̃ам̣ джӣвам̣ ан̃н̃ам̣ сарӣранти ва̄ бхиккху дит̣т̣хийа̄ сати брахмачарийава̄со на хотӣ’’ти.

висӯка̄йика̄нӣтиа̄ди саббам̣ миччха̄дит̣т̣хивевачанамева. са̄ хи самма̄дит̣т̣хийа̄ винивиджджханат̣т̣хена висӯкамива атта̄нам̣ а̄варан̣ато висӯка̄йикам̣, самма̄дит̣т̣хим̣ анануваттитва̄ тасса̄ виродхена паваттанато висевитам̣, када̄чи уччхедасса када̄чи сассатасса гахан̣ато вирӯпам̣ пхандитам̣ виппхандитанти вуччати. та̄ла̄ваттхуката̄нӣти та̄лаваттху вийа ката̄ни, пуна авирухан̣ат̣т̣хена маттхакаччхинната̄ло вийа самӯлам̣ та̄лам̣ уддхаритва̄ тасса патит̣т̣хитат̣т̣ха̄нам̣ вийа ча ката̄нӣти аттхо. анабха̄вам̣ката̄нӣти ануабха̄вам̣ ката̄нӣти. пан̃чамам̣.