3. саман̣абра̄хман̣асуттаван̣н̣ана̄

13. татийе саман̣а̄ ва̄ бра̄хман̣а̄ ва̄ти сачча̄ни пат̣ивиджджхитум̣ асаматтха̄ ба̄хиракасаман̣абра̄хман̣а̄. джара̄маран̣ам̣ наппаджа̄нантӣтиа̄дӣсу джара̄маран̣ам̣ на джа̄нанти дуккхасаччавасена, джара̄маран̣асамудайам̣ на джа̄нанти саха тан̣ха̄йа джа̄ти джара̄маран̣асса самудайоти самудайасаччавасена, джара̄маран̣аниродхам̣ на джа̄нанти ниродхасаччавасена, пат̣ипадам̣ на джа̄нанти маггасаччавасена. джа̄тим̣ на джа̄нанти дуккхасаччавасена, джа̄тисамудайам̣ на джа̄нанти саха тан̣ха̄йа бхаво джа̄тисамудайоти самудайасаччавасена. евам̣ саха тан̣ха̄йа самудайам̣ йоджетва̄ саббападесу чатусаччавасена аттхо ведитаббо. са̄ман̃н̃аттхам̣ ва̄ брахман̃н̃аттхам̣ ва̄ти еттха арийамагго са̄ман̃н̃ан̃чева брахман̃н̃ан̃ча. убхайаттха̄пи пана аттхо на̄ма арийапхалам̣ ведитаббам̣. ити бхагава̄ имасмим̣ сутте ека̄дасасу т̣ха̄несу чатта̄ри сачча̄ни катхесӣти. татийам̣.