2. упат̣т̣ха̄насуттаван̣н̣ана̄

222. дутийе супатӣти айам̣ кира кхӣн̣а̄саво, со дӯре бхиккха̄ча̄рага̄мам̣ гантва̄ а̄гато пан̣н̣аса̄ла̄йа паттачӣварам̣ пат̣иса̄метва̄ авидӯре джа̄тассарам̣ отаритва̄ гатта̄ни утум̣ га̄ха̄петва̄ дива̄т̣т̣ха̄нам̣ саммаджджитва̄ таттха нӣчаман̃чакам̣ пан̃н̃а̄петва̄ ниддам̣ аноккамантова нипанно. кхӣн̣а̄савасса̄пи хи ка̄йадаратхо хотийева̄ти тасса виноданаттхам̣, там̣ сандха̄йа супатӣти вуттам̣. аджджхабха̄сӣти ‘‘айам̣ бхиккху саттху сантике каммат̣т̣ха̄нам̣ гахетва̄ дива̄ супати, дива̄соппан̃ча на̄метам̣ вад̣д̣хитам̣ дит̣т̣хадхаммикасампара̄йикам̣ аттхам̣ на̄сетӣ’’ти ман̃н̃ама̄на̄ ‘‘чодесса̄ми на’’нти чинтетва̄ абха̄си.

а̄турасса̄ти джара̄туро рога̄туро килеса̄туроти тайо а̄тура̄, тесу килеса̄турам̣ сандха̄йевама̄ха. саллавиддхасса̄ти сависена саттисаллена вийа авиджджа̄висавит̣т̣хена тан̣ха̄саллена хадайе виддхасса. руппатоти гхат̣т̣ийама̄насса.

ида̄нисса ка̄месу а̄дӣнавам̣ катхайантӣ аничча̄тиа̄дима̄ха. таттха аситанти тан̣ха̄дит̣т̣хиниссайена анисситам̣. касма̄ паббаджитам̣ тапети еварӯпам̣ кхӣн̣а̄савам̣ дива̄соппам̣ на тапати, та̄дисам̣ пана касма̄ на тапессатӣти? вадати. тхерассева ва̄ етам̣ вачанам̣, тасма̄ айаметтха аттхо – баддхесу муттам̣ аситам̣ ма̄дисам̣ кхӣн̣а̄савапаббаджитам̣ касма̄ дива̄соппам̣ тапе, на тапессатӣти? сесага̄тха̄супи есева найо. девата̄йа хи вачанапаккхе – ‘‘еварӯпам̣ кхӣн̣а̄савапаббаджитам̣ дива̄соппам̣ на тапати, та̄дисам̣ пана касма̄ на тапессати? тапессатийева̄’’ти аттхо. тхерасса вачанапаккхе – ‘‘еварӯпам̣ ма̄дисам̣ кхӣн̣а̄савапаббаджитам̣ касма̄ дива̄соппам̣ тапе? на тапатийева̄’’ти аттхо. айам̣ панеттха анутта̄нападаван̣н̣ана̄. винайа̄ти винайена. саматиккама̄ти ват̣т̣амӯлика̄йа авиджджа̄йа саматиккамена. там̣ н̃а̄н̣анти там̣ чатусаччан̃а̄н̣ам̣. парамода̄нанти парамапарисуддхам̣. паббаджитанти еварӯпена н̃а̄н̣ена саманна̄гатам̣ паббаджитам̣. виджджа̄йа̄ти чатуттхамаггавиджджа̄йа. а̄раддхавӣрийанти паггахитавӣрийам̣ парипун̣н̣авӣрийам̣. дутийам̣.