3. кассапаготтасуттаван̣н̣ана̄

223. татийе чхетанти екам̣ мигалуддакам̣. овадатӣти со кира мигалуддако па̄това бхун̃джитва̄ ‘‘миге вадхисса̄мӣ’’ти аран̃н̃ам̣ павит̣т̣хо екам̣ рохитамигам̣ дисва̄ ‘‘саттийа̄ нам̣ пахарисса̄мӣ’’ти анубандхама̄но тхерасса пат̣хамасутте вуттанайенева дива̄виха̄рам̣ нисиннасса авидӯрена паккамати. атха нам̣ тхеро – ‘‘упа̄сака, па̄н̣а̄типа̄то на̄меса апа̄йасам̣ваттанико аппа̄йукасам̣ваттанико, сакка̄ ан̃н̃енапи касиван̣иджджа̄дикаммена да̄рабхаран̣ам̣ ка̄тум̣, ма̄ еварӯпам̣ каккхал̣акаммам̣ карохӣ’’ти а̄ха. сопи ‘‘маха̄пам̣сукӯликаттхеро катхетӣ’’ти га̄равена т̣хатва̄ сотум̣ а̄раддхо. атхасса сотука̄матам̣ джанесса̄мӣти тхеро ан̇гут̣т̣хакам̣ джа̄ла̄песи. со аккхӣхипи пассати, кан̣н̣ехипи сун̣а̄ти, читтам̣ панасса ‘‘асукат̣т̣ха̄нам̣ миго гато бхависсати, асукатиттхам̣ отин̣н̣о, таттха нам̣ гантва̄ гха̄тетва̄ йа̄вадиччхакам̣ мам̣сам̣ кха̄дитва̄ сесам̣ ка̄джена̄да̄йа гантва̄ путтаке тосесса̄мӣ’’ти евам̣ мигассева анупадам̣ дха̄вати. евам̣ виккхиттачиттасса дхаммам̣ десентам̣ тхерам̣ сандха̄йа вуттам̣ ‘‘овадатӣ’’ти. аджджхабха̄сӣти ‘‘айам̣ тхеро ада̄рум̣ таччханто вийа акхетте ваппанто вийа аттанопи каммам̣ на̄сети, етасса̄пи чодесса̄ми на’’нти абха̄си.

аппапан̃н̃анти ниппан̃н̃ам̣. ачетасанти ка̄ран̣аджа̄нанасаматтхена читтена рахитам̣. мандова̄ти андхаба̄ло вийа. сун̣а̄тӣти тава дхаммакатхам̣ сун̣а̄ти. на виджа̄на̄тӣти аттхамасса на джа̄на̄ти. а̄локетӣти тава путхуджджаникаиддхийа̄ джалантам̣ ан̇гут̣т̣хакам̣ а̄локети. на пассатӣти еттха ‘‘нева телам̣ на ват̣т̣и на дӣпакапаллика̄, тхерасса пана а̄нубха̄вена̄йам̣ джалатӣ’’ти имам̣ ка̄ран̣ам̣ на пассати. даса паджджотети дасасу ан̇гулӣсу даса падӣпе. рӯпа̄нӣти ка̄ран̣арӯпа̄ни. чаккхӯти пан̃н̃а̄чаккху. сам̣вегама̄па̄дӣти ким̣ ме имина̄ти? вӣрийам̣ паггайха парамавивекам̣ арахаттамаггам̣ пат̣ипаджджи. татийам̣.