2. удайасуттаван̣н̣ана̄

198. дутийе оданена пӯресӣти аттано аттха̄йа сампа̄дитена сӯпабйан̃джанена оданена пӯретва̄ ада̄си. бхагава̄ кира паччӯсасамайе локам̣ олокентова там̣ бра̄хман̣ам̣ дисва̄, па̄това сарӣрапат̣иджагганам̣ катва̄, гандхакут̣им̣ пависитва̄, два̄рам̣ пидха̄йа, нисинно тасса бходжанам̣ упасам̣харийама̄нам̣ дисва̄, екакова паттам̣ ам̣сакӯт̣е лаггетва̄, гандхакут̣ито никкхамма, нагарадва̄ре паттам̣ нӣхаритва̄, антонагарам̣ пависитва̄, пат̣ипа̄т̣ийа̄ гаччханто бра̄хман̣асса два̄ракот̣т̣хаке ат̣т̣ха̄си. бра̄хман̣о бхагавантам̣ дисва̄, аттано саджджитам̣ бходжанам̣ ада̄си. там̣ сандха̄йетам̣ вуттам̣. дутийампӣти дутийадивасепи. татийампӣти татийадивасепи. та̄ни кира тӣн̣и диваса̄ни нирантарам̣ бра̄хман̣асса гхарадва̄рам̣ гаччхантасса бхагавато антара̄ ан̃н̃о кочи ут̣т̣ха̄йа паттам̣ гахетум̣ саматтхо на̄ма на̄хоси, маха̄джано олокентова ат̣т̣ха̄си.

етадавоча̄ти бра̄хман̣о тӣн̣и диваса̄ни паттам̣ пӯретва̄ дентопи на саддха̄йа ада̄си, ‘‘гхарадва̄рам̣ а̄гантва̄ т̣хитасса паббаджитасса бхиккха̄маттампи адатва̄ бхун̃джатӣ’’ти упа̄рамбхабхайена ада̄си. даданто ча две диваса̄ни датва̄ кин̃чи аватва̄ва ниватто. бхагава̄пи кин̃чи аватва̄ва пакканто. татийадивасе пана адхива̄сетум̣ асакконто етам̣ ‘‘пакат̣т̣хако’’тиа̄дивачанам̣ авоча. бхагава̄пи етам̣ вачанам̣ ниччха̄ра̄панаттхамева йа̄ва татийамагама̄си. таттха пакат̣т̣хакоти расагиддхо.

пунаппунам̣ чева вапанти бӣджанти саттха̄ бра̄хман̣асса вачанам̣ сутва̄, ‘‘бра̄хман̣а, твам̣ тӣн̣и диваса̄ни пин̣д̣апа̄там̣ датва̄ осаккаси, пунаппунам̣ ка̄табба̄ на̄ма локасмим̣ сол̣аса дхамма̄’’ти ватва̄ те дхамме дассетум̣ имам̣ десанам̣ а̄рабхи. таттха пунаппунам̣ чева вапантӣти екасмим̣ сассава̄ре вуттам̣ ‘‘аламетта̄вата̄’’ти аносаккитва̄ апара̄паресупи сассава̄ресу ча вапантийева. пунаппунам̣ вассатӣти на екадивасам̣ васситва̄ тит̣т̣хати, пунаппунадивасесупи пунаппунасам̣ваччхаресупи вассатийева, евам̣ джанапада̄ иддха̄ хонти. етенупа̄йена саббаттха найо ведитаббо.

йа̄чака̄ти имасмим̣ паде саттха̄ десана̄кусалата̄йа атта̄нампи паккхипитва̄ дассети. кхӣраника̄ти кхӣрака̄рака̄ годохака̄. на хи те екава̄рамева тханам̣ ан̃чханти, пунаппунам̣ ан̃чханта̄ дхенум̣ духантӣти аттхо. киламати пхандати ча̄ти айам̣ сатто тена ирийа̄патхена киламати чева пхандати ча. габбханти сон̣асин̇га̄ла̄дӣнампи тираччха̄нагата̄нам̣ куччхим̣. сиватхиканти суса̄нам̣, матам̣ матам̣ саттам̣ таттха пунаппунам̣ харантӣти аттхо. магган̃ча ладдха̄ апунаббхава̄йа̄ти апунаббхава̄йа магго на̄ма нибба̄нам̣, там̣ лабхитва̄ти аттхо.

евам̣ вуттети евам̣ бхагавата̄ антаравӣтхийам̣ т̣хатва̄ва сол̣аса пунаппунадхамме десентена вутте. етадавоча̄ти десана̄парийоса̄не пасанно саддхим̣ путтада̄рамиттан̃а̄тиваггена бхагавато па̄де вандитва̄ етам̣ ‘‘абхиккантам̣ бхо’’тиа̄дивачанам̣ авоча. дутийам̣.