12. кхомадуссасуттаван̣н̣ана̄

208. два̄дасаме кхомадуссам̣ на̄ма̄ти кхомадусса̄нам̣ уссаннатта̄ евам̣ладдхана̄мам̣. сабха̄йанти са̄ла̄йам̣. пхуса̄йатӣти пхусита̄ни мун̃чати вассати. саттха̄ кира там̣ сабхам̣ упасан̇камитука̄мо – ‘‘майи евамевам̣ упасан̇каманте апха̄сукадха̄тукам̣ хоти, екам̣ ка̄ран̣ам̣ пат̣ичча упасан̇камисса̄мӣ’’ти адхит̣т̣ха̄навасена вут̣т̣хим̣ уппа̄деси. сабха̄дхамманти сукханисинне кира асан̃ча̄летва̄ екапассена пависанам̣ тесам̣ сабха̄дхаммо на̄ма, на маха̄джанам̣ ча̄летва̄ уджукамева пависанам̣. бхагава̄ ча уджукамева а̄гаччхати, тена те купита̄ бхагавантам̣ хӣл̣ента̄ ‘‘ке ча мун̣д̣ака̄ саман̣ака̄, ке ча сабха̄дхаммам̣ джа̄ниссантӣ’’ти а̄хам̣су. сантоти пан̣д̣ита̄ саппуриса̄. паха̄йа̄ти ете ра̄га̄дайо джахитва̄ ра̄га̄дивинайа̄йа дхаммам̣ бхан̣анти, тасма̄ те санто на̄ма̄ти. два̄дасамам̣.

упа̄сакавагго дутийо.

ити са̄раттхаппака̄синийа̄

сам̣йуттаника̄йа-ат̣т̣хакатха̄йа

бра̄хман̣асам̣йуттаван̣н̣ана̄ нит̣т̣хита̄.