2. аккосасуттаван̣н̣ана̄

188. дутийе аккосакабха̄радва̄джоти бха̄радва̄джова со, пан̃чаматтехи пана га̄тха̄ сатехи татха̄гатам̣ аккосанто а̄гатоти. ‘‘аккосакабха̄радва̄джо’’ти тасса сан̇гӣтика̄рехи на̄мам̣ гахитам̣. купито анаттаманоти ‘‘саман̣ена готамена майхам̣ джет̣т̣хакабха̄тарам̣ пабба̄джентена джа̄ни ката̄, паккхо бхинно’’ти кодхена купито доманассена ча анаттамано хутва̄ти аттхо. аккосатӣти ‘‘чороси, ба̄лоси, мӯл̣хоси, тхеноси, от̣т̣хоси, мен̣д̣оси, гон̣оси, гадрабхоси, тираччха̄нагатоси, нерайикосӣ’’ти дасахи аккосаваттхӯхи аккосати. парибха̄сатӣти ‘‘хоту мун̣д̣акасаман̣ака, ‘адан̣д̣о аха’нти кароси, ида̄ни те ра̄джакулам̣ гантва̄ дан̣д̣ам̣ а̄ропесса̄мӣ’’тиа̄дӣни ваданто парибха̄сати на̄ма.

самбхун̃джатӣти екато бхун̃джати. вӣтихаратӣти катасса пат̣ика̄рам̣ кароти. бхагавантам̣ кхо, готаманти касма̄ евама̄ха? ‘‘тавеветам̣, бра̄хман̣а, тавеветам̣, бра̄хман̣а̄’’ти кирасса сутва̄. ‘‘исайо на̄ма купита̄ сапанам̣ денти кисаваччха̄дайо вийа̄’’ти ануссававасена ‘‘сапати мам̣ ман̃н̃е саман̣о готамо’’ти бхайам̣ уппаджджи. тасма̄ евама̄ха.

дантасса̄ти ниббисеванасса. та̄диноти та̄дилаккхан̣ам̣ паттасса. тассева тена па̄пийоти тассева пуггаласса тена кодхена па̄пам̣ хоти. сато упасамматӣти сатийа̄ саманна̄гато хутва̄ адхива̄сети. убхиннам̣ тикиччханта̄нанти убхиннам̣ тикиччхантам̣. айамева ва̄ па̄т̣хо. йо пуггало сато упасаммати, убхиннаматтхам̣ чарати тикиччхати са̄дхети, там̣ пуггалам̣ джана̄ ба̄лоти ман̃н̃анти. кӣдиса̄ джана̄? йе дхаммасса аковида̄. дхаммасса̄ти пан̃чаккхандхадхаммасса ва̄ чатусаччадхаммасса ва̄. аковида̄ти тасмим̣ дхамме акусала̄ андхаба̄лапутхуджджана̄. дутийам̣.