10. кока̄ликасуттаван̣н̣ана̄

181. дасаме кока̄лико бхиккху йена бхагава̄ тенупасан̇камӣти, ко айам̣ кока̄лико, касма̄ ча упасан̇ками? айам̣ кира кока̄ликарат̣т̣хе кока̄ликанагаре кока̄ликасет̣т̣хисса путто паббаджитва̄ питара̄ ка̄ра̄пите виха̄ре пат̣ивасати чӯл̣акока̄ликоти на̄мена, на девадаттасса сиссо. со хи бра̄хман̣апутто маха̄кока̄лико на̄ма. бхагавати пана са̄ваттхийам̣ вихаранте две аггаса̄вака̄ пан̃чаматтехи бхиккхусатехи саддхим̣ джанападача̄рикам̣ чарама̄на̄ упакат̣т̣ха̄йа вассӯпана̄йика̄йа вивека̄ва̄сам̣ васитука̄ма̄ те бхиккхӯ уййоджетва̄ аттано паттачӣварама̄да̄йа тасмим̣ джанападе там̣ нагарам̣ патва̄ там̣ виха̄рам̣ агамам̣су. таттха несам̣ кока̄лико ваттам̣ дассеси. те тена саддхим̣ саммодитва̄, ‘‘а̄вусо, майам̣ идха тема̄сам̣ васисса̄ма, ма̄ кассачи а̄рочехӣ’’ти пат̣ин̃н̃ам̣ гахетва̄ васим̣су. васитва̄ пава̄ран̣а̄дивасе пава̄ретва̄, ‘‘гаччха̄ма майам̣, а̄вусо’’ти кока̄ликам̣ а̄пуччхим̣су. кока̄лико ‘‘аджджекадивасам̣, а̄вусо, васитва̄ све гамиссатха̄’’ти ватва̄ дутийадивасе нагарам̣ пависитва̄ мануссе а̄мантеси – ‘‘а̄вусо, тумхе аггаса̄ваке идха̄гантва̄ васама̄непи на джа̄на̄тха, на не кочи паччайена̄пи нимантетӣ’’ти. нагарава̄сино, ‘‘кахам̣, бханте, тхера̄, касма̄ но на а̄рочайиттха̄’’ти? ким̣ а̄вусо а̄рочитена, ким̣ на пассатха две бхиккхӯ тхера̄сане нисӣданте, ете аггаса̄вака̄ти. те кхиппам̣ саннипатитва̄ саппипха̄н̣ита̄дӣни чева чӣварадусса̄ни ча сам̣харим̣су.

кока̄лико чинтеси – ‘‘парамаппиччха̄ аггаса̄вака̄ пайуттава̄ча̄йа уппаннам̣ ла̄бхам̣ на са̄дийиссанти, аса̄дийанта̄ ‘а̄ва̄сикасса детха̄’ти ваккхантӣ’’ти. там̣ там̣ ла̄бхам̣ га̄ха̄петва̄ тхера̄нам̣ сантикам̣ агама̄си. тхера̄ дисва̄ва ‘‘име паччайа̄ нева амха̄кам̣, на кока̄ликасса каппантӣ’’ти пат̣иккхипитва̄ паккамим̣су. кока̄лико ‘‘катхам̣ хи на̄ма аттана̄ аган̣ханта̄ майхампи ада̄петва̄ паккамиссантӣ’’ти? а̄гха̄там̣ уппа̄деси. тепи бхагавато сантикам̣ гантва̄ бхагавантам̣ вандитва̄ пуна аттано парисам̣ а̄да̄йа джанападача̄рикам̣ чаранта̄ анупуббена тасмим̣ рат̣т̣хе тамева нагарам̣ пачча̄гамим̣су. на̄гара̄ тхере сан̃джа̄нитва̄ саха париккха̄рехи да̄нам̣ саджджитва̄ нагарамаджджхе ман̣д̣апам̣ катва̄ да̄нам̣ адам̣су, тхера̄нан̃ча париккха̄ре упана̄месум̣. тхера̄ бхиккхусан̇гхасса ниййа̄дайим̣су. там̣ дисва̄ кока̄лико чинтеси – ‘‘име пуббе аппиччха̄ ахесум̣, ида̄ни па̄пиччха̄ джа̄та̄, пуббепи аппиччхасантут̣т̣хапавивиттасадиса̄ ман̃н̃е’’ти тхере упасан̇камитва̄, ‘‘а̄вусо, тумхе пуббе аппиччха̄ вийа, ида̄ни пана па̄пабхиккхӯ джа̄та̄’’ти ватва̄ ‘‘мӯлат̣т̣ха̄нейева несам̣ патит̣т̣хам̣ бхиндисса̄мӣ’’ти тарама̄нарӯпо никкхамитва̄ са̄ваттхим̣ гантва̄ йена бхагава̄ тенупасан̇ками. айамева кока̄лико имина̄ ча ка̄ран̣ена упасан̇камӣти ведитаббо.

бхагава̄ там̣ туритатуритам̣ а̄гаччхантам̣ дисва̄ва а̄вадждженто ан̃н̃а̄си – ‘‘айам̣ аггаса̄ваке аккоситука̄мо а̄гато’’ти. ‘‘сакка̄ ну кхо пат̣иседхету’’нти ча а̄вадждженто, ‘‘на сакка̄ пат̣иседхетум̣, тхересу апараджджхитва̄ ка̄лан̇като екам̣сена падуманирайе ниббаттиссатӣ’’ти дисва̄, ‘‘са̄рипуттамоггалла̄непи на̄ма гарахантам̣ сутва̄ на ниседхетӣ’’ти ва̄дамочанаттхам̣ арийӯпава̄дасса ча маха̄са̄ваджджабха̄вадассанаттхам̣ ма̄ хеванти тиккхаттум̣ пат̣иседхеси. таттха ма̄ хеванти ма̄ евам̣ абхан̣и. саддха̄йикоти саддха̄йа а̄каро паса̄да̄вахо саддха̄таббавачано ва̄. паччайикоти паттийа̄йитаббавачано.

пакка̄мӣти камма̄нубха̄вена чодийама̄но пакка̄ми. ока̄сакатам̣ хи каммам̣ на сакка̄ пат̣иба̄хитум̣, там̣ тасса таттха т̣ха̄тум̣ на ада̄си. ачирапаккантасса̄ти паккантасса сато на чиренева. саббо ка̄йо пхут̣о ахосӣти кесаггаматтампи ока̄сам̣ а̄ваджджетва̄ сакаласарӣрам̣ ат̣т̣хӣни бхиндитва̄ уггата̄хи пӣл̣ака̄хи аджджхоттхат̣ам̣ ахоси. йасма̄ пана буддха̄нубха̄вена татха̄рӯпам̣ каммам̣ буддха̄нам̣ саммукхӣбха̄ве випа̄кам̣ на дети, дассанӯпача̄ре виджахитаматте дети, тасма̄ тасса ачирапаккантасса пӣл̣ака̄ ут̣т̣хахим̣су. кала̄йаматтийоти чан̣акаматтийо. белувасала̄т̣укаматтийоти тарун̣абелуваматтийо. (билламаттийоти маха̄белуваматтийо.) пабхиджджим̣сӯти бхиджджим̣су. та̄су бхинна̄су сакаласарӣрам̣ панасапаккам̣ вийа ахоси. со паккена гаттена джетаванадва̄ракот̣т̣хаке висагилито маччхо вийа кадалипаттесу сайи. атха дхаммасаванаттхам̣ а̄гата̄гата̄ манусса̄ – ‘‘дхи кока̄лика, дхи кока̄лика, айуттамака̄си, аттанойева мукхам̣ нисса̄йа анайабйасанам̣ патто’’ти а̄хам̣су. тесам̣ сутва̄ а̄раккхадевата̄ дхи-ка̄рам̣ акам̣су. а̄раккхакадевата̄нам̣ а̄ка̄садевата̄ти имина̄ упа̄йена йа̄ва аканит̣т̣хабхавана̄ екадхика̄ро удапа̄ди. атхасса упаджджха̄йо а̄гантва̄ ова̄дам̣ аган̣хантам̣ н̃атва̄ гарахитва̄ пакка̄ми.

ка̄ламака̄сӣти упаджджха̄йе пакканте ка̄ламака̄си. падумам̣ нирайанти па̄т̣ийекко падуманирайо на̄ма наттхи, авӣчимаха̄нирайамхийева пана падумаган̣ана̄йа паччитаббе екасмим̣ т̣ха̄не ниббатти.

вӣсатикха̄рикоти ма̄гадхакена паттхена чатта̄ро паттха̄ косаларат̣т̣хе екапаттхо хоти, тена паттхена чатта̄ро паттха̄ а̄л̣хакам̣, чатта̄ри а̄л̣хака̄ни дон̣ам̣, чатудон̣а̄ ма̄ника̄, чатума̄ника̄ кха̄рӣ, та̄йа кха̄рийа̄ вӣсатикха̄рико. тилава̄хоти ма̄гадхака̄нам̣ сукхуматила̄нам̣ тиласакат̣ам̣. аббудо нирайоти аббудо на̄ма па̄т̣ийекко нирайо наттхи. авӣчимхийева пана аббудаган̣ана̄йа паччитаббат̣т̣ха̄нассетам̣ на̄мам̣. нираббуда̄дӣсупи есева найо.

вассаган̣ана̄пи панеттха евам̣ ведитабба̄ – йатхева хи сатам̣ сатасахасса̄ни кот̣и хоти, евам̣ сатам̣ сатасахассакот̣ийо пакот̣и на̄ма хоти, сатам̣ сатасахассапакот̣ийо кот̣ипакот̣и на̄ма, сатам̣ сатасахассакот̣ипакот̣ийо нахутам̣, сатам̣ сатасахассанахута̄ни ниннахутам̣, сатам̣ сатасахассаниннахута̄ни екам̣ аббудам̣, тато вӣсатигун̣ам̣ нираббудам̣. есева найо саббаттха̄ти. дасамам̣.

пат̣хамо вагго.