3. джара̄маран̣асуттаван̣н̣ана̄

114. татийе ан̃н̃атра джара̄маран̣а̄ти джара̄маран̣ато мутто на̄ма аттхӣти вуччати. кхаттийамаха̄са̄ла̄ти кхаттийамаха̄са̄ла̄ на̄ма маха̄са̄раппатта̄ кхаттийа̄. йесам̣ хи кхаттийа̄нам̣ хет̣т̣химантена кот̣исатам̣ нидха̄нагатам̣ хоти, тайо каха̄пан̣акумбха̄ валан̃джанаттха̄йа гехамаджджхе ра̄сим̣ катва̄ т̣хапита̄ хонти, те кхаттийамаха̄са̄ла̄ на̄ма. йесам̣ бра̄хман̣а̄нам̣ асӣтикот̣идханам̣ нихитам̣ хоти, дийад̣д̣хо каха̄пан̣акумбхо валан̃джанаттха̄йа гехамаджджхе ра̄сим̣ катва̄ т̣хапито хоти, те бра̄хман̣амаха̄са̄ла̄ на̄ма. йесам̣ гахапатӣнам̣ чатта̄лӣсакот̣идханам̣ нихитам̣ хоти, каха̄пан̣акумбхо валан̃джанаттха̄йа гехамаджджхе ра̄сим̣ катва̄ т̣хапито хоти, те гахапатимаха̄са̄ла̄ на̄ма.

ад̣д̣ха̄ти иссара̄. нидха̄нагатадханасса махантата̄йа махаддхана̄. суван̣н̣араджатабха̄джана̄дӣнам̣ упабхогабхан̣д̣а̄нам̣ махантата̄йа маха̄бхога̄. анидха̄нагатасса джа̄тарӯпараджатасса пахӯтата̄йа, пахӯтаджа̄тарӯпараджата̄. виттӯпакаран̣асса тут̣т̣хикаран̣асса пахӯтата̄йа пахӯтавиттӯпакаран̣а̄. годхана̄дӣнан̃ча саттавидхадхан̃н̃а̄нан̃ча пахӯтата̄йа пахӯтадханадхан̃н̃а̄. тесампи джа̄та̄нам̣ наттхи ан̃н̃атра джара̄маран̣а̄ти тесампи евам̣ иссара̄нам̣ джа̄та̄нам̣ ниббатта̄нам̣ наттхи ан̃н̃атра джара̄маран̣а̄, джа̄татта̄йева джара̄маран̣ато моккхо на̄ма наттхи, антоджара̄маран̣ейева хоти.

арахантотиа̄дӣсу а̄рака̄ килесехӣти араханто. кхӣн̣а̄ етесам̣ чатта̄ро а̄сава̄ти кхӣн̣а̄сава̄. брахмачарийава̄сам̣ вут̣т̣ха̄ паринит̣т̣хитава̄са̄ти вуситаванто. чатӯхи маггехи каран̣ӣйам̣ етесам̣ катанти катакаран̣ӣйа̄. кхандхабха̄ро килесабха̄ро абхисан̇кха̄рабха̄ро ка̄магун̣абха̄роти, име охита̄ бха̄ра̄ етесанти охитабха̄ра̄. ануппатто арахаттасан̇кха̄то сако аттхо етесанти ануппаттасадаттха̄. дасавидхампи париккхӣн̣ам̣ бхавасам̣йоджанам̣ етесанти париккхӣн̣абхавасам̣йоджана̄. самма̄ ка̄ран̣ехи джа̄нитва̄ вимутта̄ти саммадан̃н̃а̄вимутта̄. маггапан̃н̃а̄йа чатусаччадхаммам̣ н̃атва̄ пхалавимуттийа̄ вимутта̄ти аттхо. бхеданадхаммоти бхиджджанасабха̄во. никкхепанадхаммоти никкхипитаббасабха̄во. кхӣн̣а̄савасса хи аджӣран̣адхаммопи аттхи, а̄рамман̣ато пат̣ивиддхам̣ нибба̄нам̣, там̣ хи на джӣрати. идха панасса джӣран̣адхаммам̣ дассенто евама̄ха. аттхуппаттико кирасса суттасса никкхепо. сивикаса̄ла̄йа нисӣдитва̄ катхитанти ваданти. таттха бхагава̄ читра̄ни ратхайа̄на̄дӣни дисва̄ дит̣т̣хамева упамам̣ катва̄, ‘‘джӣранти ве ра̄джаратха̄’’ти га̄тхама̄ха.

таттха джӣрантӣти джарам̣ па̄пун̣анти. ра̄джаратха̄ти ран̃н̃о абхирӯханаратха̄. сучитта̄ти суван̣н̣араджата̄дӣхи сут̣т̣ху читтита̄. атхо сарӣрампи джарам̣ упетӣти еварӯпесу анупа̄дин̣н̣акесу са̄рада̄румайесу ратхесу джӣрантесу имасмим̣ аджджхаттике упа̄дин̣н̣аке мам̣салохита̄димайе сарӣре ким̣ ваттаббам̣? сарӣрампи джарам̣ упетийева̄ти аттхо. санто хаве саббхи паведайантӣти санто саббхӣхи саддхим̣ сатам̣ дхаммо на джарам̣ упетӣти евам̣ паведайанти. ‘‘сатам̣ дхаммо на̄ма нибба̄нам̣, там̣ на джӣрати, аджарам̣ аматанти евам̣ катхентӣ’’ти аттхо. йасма̄ ва̄ нибба̄нам̣ а̄гамма сӣданасабха̄ва̄ килеса̄ бхиджджанти, тасма̄ там̣ саббхӣти вуччати. ити пуримападасса ка̄ран̣ам̣ дассенто ‘‘санто хаве саббхи паведайантӣ’’ти а̄ха. идам̣ хи вуттам̣ хоти – сатам̣ дхаммо на джарам̣ упети, тасма̄ санто саббхи паведайанти. аджарам̣ нибба̄нам̣ сатам̣ дхаммоти а̄чиккхантӣти аттхо. сундара̄дхивачанам̣ ва̄ етам̣ саббхӣти. йам̣ саббхидхаммабхӯтам̣ нибба̄нам̣ санто паведайанти катхайанти, со сатам̣ дхаммо на джарам̣ упетӣтипи аттхо. татийам̣.