2. дуббан̣н̣ийасуттаван̣н̣ана̄

268. дутийе дуббан̣н̣оти джха̄макха̄н̣уван̣н̣о. окот̣имакоти лакун̣д̣ако маходаро. а̄санети пан̣д̣укамбаласила̄йам̣. кодхабхаккхоти саккена гахитана̄мамеветам̣. со пана еко рӯпа̄вачарабрахма̄, ‘‘сакко кира кхантибалена саманна̄гато’’ти сутва̄ вӣмам̣санаттхам̣ а̄гато. аваруддхакайаккха̄ пана еварӯпам̣ сам̣вихита̄раккхам̣ т̣ха̄нам̣ пависитум̣ на сакконти. упасан̇камӣти дева̄нам̣ сутва̄ ‘‘на сакка̄ еса пхарусена ча̄летум̣, нӣчавуттина̄ пана кхантийам̣ т̣хитена сакка̄ пала̄пету’’нти татха̄ пала̄петука̄мо упасан̇ками. антарадха̄йӣти кхантийам̣ т̣хатва̄ балавачиттӣка̄рам̣ паччупат̣т̣хапетва̄ нӣчавуттийа̄ дассийама̄на̄йа сакка̄сане т̣ха̄тум̣ асакконто антарадха̄йи. на сӯпахатачиттомхӣти еттха сӯти нипа̄таматтам̣, упахатачиттомхӣти а̄ха. на̄ваттена сува̄найоти на кодха̄ваттена суа̄найо, кодхавасе ваттетум̣ на сукаромхӣти вадати. на во чира̄ханти воти нипа̄таматтам̣, ахам̣ чирам̣ на куджджха̄мӣти вадати. дутийам̣.