10. сан̇гхавандана̄суттаван̣н̣ана̄

266. дасаме аджджхабха̄сӣти касма̄ еса пунаппунам̣ евам̣ бха̄сатӣти? саккасса кира деваран̃н̃о саддо мадхуро, супхаситам̣ данта̄варан̣ам̣, катханака̄ле суван̣н̣акин̇кин̣икасаддо вийа ниччхарати. там̣ пунаппунам̣ сотум̣ лабхисса̄мӣти бха̄сати. пӯтидехасайа̄ти пӯтимхи ма̄тусарӣре ва̄, аттанойева ва̄ сарӣрам̣ аваттхаритва̄ сайанато пӯтидехасайа̄. нимугга̄ кун̣апамхетети дасама̄се ма̄тукуччхисан̇кха̄те кун̣апасмим̣ ете нимугга̄. етам̣ тесам̣ пихайа̄мӣти етесам̣ етам̣ пихайа̄ми паттхайа̄ми. на те сам̣ кот̣т̣хе опентӣти на те сам̣ сантакам̣ дхан̃н̃ам̣ кот̣т̣хе паккхипанти. на хи етесам̣ дхан̃н̃ам̣ аттхи. на кумбхӣти на кумбхийам̣. на кал̣опийанти на паччхийам̣. паранит̣т̣хитамеса̄на̄ти паресам̣ нит̣т̣хитам̣ парагхаре паккам̣ бхиккха̄ча̄раваттена есама̄на̄ гавесама̄на̄. тена̄ти евам̣ парийит̣т̣хена. суббата̄ти дасапи…пе… сат̣т̣хипи васса̄ни сусама̄диннасундаравата̄.

сумантамантиноти дхаммам̣ саджджха̄йисса̄ма, дхутан̇гам̣ сама̄дийисса̄ма, аматам̣ парибхун̃джисса̄ма, саман̣адхаммам̣ карисса̄ма̄ти евам̣ субха̄ситабха̄сино. тун̣хӣбхӯта̄ саман̃чара̄ти тийа̄мараттим̣ асанигхосена гхосита̄ вийа дхаммам̣ катхента̄пи тун̣хӣбхӯта̄ самам̣ чарантийева на̄ма. касма̄? нираттхакавачанасса̄бха̄ва̄. путхумачча̄ ча̄ти бахусатта̄ ча ан̃н̃аман̃н̃ам̣ вируддха̄. аттадан̣д̣есу ниббута̄ти паравихет̣ханаттхам̣ гахитадан̣д̣есу саттесу ниббута̄ виссат̣т̣хадан̣д̣а̄. са̄да̄несу ана̄да̄на̄ти сагахан̣есу саттесу ча бхавайониа̄дӣнам̣ екакот̣т̣ха̄сасса̄пи агахитатта̄ агахан̣а̄. дасамам̣.

дутийо вагго.