10. самуддакасуттаван̣н̣ана̄

256. дасаме самуддатӣре пан̣н̣акут̣ӣсӯти чаккава̄л̣амаха̄самуддапит̣т̣хийам̣ раджатапат̣т̣аван̣н̣е ва̄лукапул̣ине вуттаппака̄ра̄су пан̣н̣аса̄ла̄су васанти. сийа̄пи ноти сийа̄пи амха̄кам̣. абхайадаккхин̣ам̣ йа̄чеййа̄ма̄ти абхайада̄нам̣ йа̄чеййа̄ма. йебхуййена кира дева̄сурасан̇га̄мо маха̄самуддапит̣т̣хе хоти. асура̄нам̣ на саббака̄лам̣ джайо хоти, бахува̄ре пара̄джайова хоти. те девехи пара̄джита̄ пала̄йанта̄ исӣнам̣ ассамападена гаччханта̄ ‘‘сакко имехи саддхим̣ мантетва̄ амхе на̄сети, ган̣хатха путтахата̄йа путте’’ти купита̄ ассамападе па̄нӣйагхат̣ачан̇каманаса̄ла̄дӣни виддхам̣сенти. исайо аран̃н̃ато пхала̄пхалам̣ а̄да̄йа а̄гата̄ нам̣ дисва̄ пуна дуккхена пат̣ипа̄катикам̣ каронти. тепи пунаппунам̣ татхева вина̄сенти. тасма̄ ‘‘ида̄ни тесам̣ сан̇га̄мо паччупат̣т̣хито’’ти сутва̄ евам̣ чинтайим̣су.

ка̄мам̣кароти иччхитакаро. бхайасса абхайасса ва̄ти бхайам̣ ва̄ абхайам̣ ва̄. идам̣ вуттам̣ хоти – саче твам̣ абхайам̣ да̄тука̄мо, абхайам̣ да̄тум̣ пахоси. саче бхайам̣ да̄тука̄мо. бхайам̣ да̄тум̣ пахоси. амха̄кам̣ пана абхайада̄нам̣ дехӣти. дут̣т̣ха̄нанти вируддха̄нам̣. павуттанти кхетте патит̣т̣ха̄питам̣.

тиккхаттум̣ уббиджджӣти са̄йама̄сабхаттам̣ бхун̃джитва̄ сайанам̣ абхируйха нипанно нидда̄йа оккантаматта̄йа саманта̄ т̣хатва̄ саттисатена пахат̣о вийа вираванто ут̣т̣хахати, дасайоджанасахассам̣ асурабхаванам̣ ‘‘кимида’’нти сан̇кхобхам̣ а̄паджджати. атха нам̣ а̄гантва̄ ‘‘кимида’’нти пуччханти. со ‘‘на кин̃чӣ’’ти вадати. дутийайа̄ма̄дӣсупи есева найо. ити асура̄нам̣ ‘‘ма̄ бха̄йи, маха̄ра̄джа̄’’ти там̣ асса̄сента̄нам̣йева арун̣ам̣ уггаччхати. евамасса тато пат̣т̣ха̄йа гелан̃н̃аджа̄там̣ читтам̣ вепати. тенева часса ‘‘вепачиттӣ’’ти апарам̣ на̄мам̣ удапа̄дӣти. дасамам̣.

пат̣хамо вагго.