6. наджӣратисуттаван̣н̣ана̄

76. чхат̣т̣хе на̄маготтам̣ на джӣратӣти атӣтабуддха̄нам̣ йа̄ваджджадиваса̄ на̄маготтам̣ катхийати, тасма̄ на джӣратӣти вуччати. пора̄н̣а̄ пана ‘‘аддха̄не гаччханте на пан̃н̃а̄йиссати, джӣран̣асабха̄во пана на хотийева̄’’ти ваданти. а̄ласйанти а̄ласийам̣, йена т̣хитат̣т̣ха̄не т̣хитова, нисиннат̣т̣ха̄не нисиннова хоти, телепи уттаранте т̣хитим̣ на кароти. пама̄доти нидда̄йа ва̄ килесавасена ва̄ пама̄до. анут̣т̣ха̄нанти каммасамайе каммакаран̣авӣрийа̄бха̄во. асам̣йамоти сӣласан̃н̃ама̄бха̄во виссат̣т̣ха̄ча̄рата̄. нидда̄ти соппабахулата̄. та̄йа гаччхантопи т̣хитопи нисиннопи нидда̄йати, пагева нипанно. тандӣти атиччха̄та̄дивасена а̄гантука̄ласийам̣. те чхиддети та̄ни чха чхидда̄ни вивара̄ни. саббасоти сабба̄ка̄рена. танти нипа̄таматтам̣. виваджджайети ваджджеййа джахеййа. чхат̣т̣хам̣.