4. вут̣т̣хисуттаван̣н̣ана̄

74. чатуттхе бӣджанти уппатанта̄нам̣ саттавидхам̣ дхан̃н̃абӣджам̣ сет̣т̣хам̣. тасмин̃хи уггате джанападо кхемо хоти субхиккхо. нипататанти нипатанта̄нам̣ мегхавут̣т̣хи сет̣т̣ха̄. мегхавут̣т̣хийан̃хи сати вивидха̄ни сасса̄ни уппаджджанти, джанапада̄ пхӣта̄ хонти кхема̄ субхиккха̄. паваджама̄на̄нанти джан̇гама̄нам̣ падаса̄ чарама̄на̄нам̣ га̄во сет̣т̣ха̄. та̄ нисса̄йа хи сатта̄ пан̃ча горасе парибхун̃джама̄на̄ сукхам̣ вихаранти. павадатанти ра̄джакуламаджджха̄дӣсу ваданта̄нам̣ путто варо. со хи ма̄та̄питӯнам̣ анаттха̄вахам̣ на вадати.

виджджа̄ уппататам̣ сет̣т̣ха̄ти пуримапан̃хе кира сутва̄ самӣпе т̣хита̄ ека̄ девата̄ ‘‘девате, касма̄ твам̣ етам̣ пан̃хам̣ дасабалам̣ пуччхаси? ахам̣ те катхесса̄мӣ’’ти аттано кхантийа̄ ладдхийа̄ пан̃хам̣ катхеси. атха нам̣ итара̄ девата̄ а̄ха – ‘‘йа̄ва падхам̣сӣ вадеси девате йа̄ва пагаббха̄ мукхара̄, ахам̣ буддхам̣ бхагавантам̣ пуччха̄ми. твам̣ майхам̣ касма̄ катхесӣ’’ти? ниваттетва̄ тадева пан̃хам̣ дасабалам̣ пуччхи. атхасса̄ саттха̄ виссадждженто виджджа̄ уппататантиа̄дима̄ха. таттха виджджа̄ти чатумаггавиджджа̄. са̄ хи уппатама̄на̄ сабба̄кусаладхамме самуггха̄тети. тасма̄ ‘‘уппататам̣ сет̣т̣ха̄’’ти вутта̄. авиджджа̄ти ват̣т̣амӯлакамаха̄авиджджа̄. са̄ хи нипатанта̄нам̣ осӣданта̄нам̣ вара̄. паваджама̄на̄нанти падаса̄ чарама̄на̄нам̣ джан̇гама̄нам̣ аномапун̃н̃аккхеттабхӯто сан̇гхо варо. тан̃хи таттха таттха дисва̄ пасанначитта̄ сатта̄ соттхим̣ па̄пун̣анти. буддхоти йа̄дисо путто ва̄ хоту ан̃н̃о ва̄, йесам̣ кесан̃чи вадама̄на̄нам̣ буддхо варо. тасса хи дхаммадесанам̣ а̄гамма анекасатасахасса̄нам̣ па̄н̣а̄нам̣ бандханамоккхо хотӣти. чатуттхам̣.