1. джара̄суттаван̣н̣ана̄

51. джара̄ваггасса пат̣хаме са̄дхӯти ладдхакам̣ бхаддакам̣. сӣлам̣ йа̄ва джара̄ти имина̄ идам̣ дассети – йатха̄ мутта̄ман̣ираттаваттха̄дӣни а̄бхаран̣а̄ни тарун̣ака̄лейева собханти, джара̄джин̣н̣ака̄ле та̄ни дха̄ренто ‘‘айам̣ аджджа̄пи ба̄лабха̄вам̣ паттхети, умматтако ман̃н̃е’’ти ваттаббатам̣ а̄паджджати, на евам̣ сӣлам̣. сӣлан̃хи ниччака̄лам̣ собхати. ба̄лака̄лепи хи сӣлам̣ раккхантам̣ ‘‘ким̣ имасса сӣлена̄’’ти? ватта̄ро наттхи. маджджхимака̄лепи махаллакака̄лепӣти.

саддха̄ са̄дху патит̣т̣хита̄ти хаттха̄л̣авакачиттагахапатиа̄дӣнам̣ вийа маггена а̄гата̄ патит̣т̣хитасаддха̄ на̄ма са̄дху. пан̃н̃а̄ нара̄нам̣ ратананти еттха читтӣкатат̣т̣ха̄дӣхи ратанам̣ ведитаббам̣. вуттан̃хетам̣ –

‘‘йади читтӣкатанти ратанам̣, нану бхагава̄ читтӣкато пурисасӣхо, йе ча локе читтӣката̄, тесам̣ читтӣкато бхагава̄. йади ратикаранти ратанам̣, нану бхагава̄ ратикаро пурисасӣхо, тасса вачанена чаранта̄ джха̄наратисукхена абхираманти. йади атулйанти ратанам̣, нану бхагава̄ атуло пурисасӣхо. на хи сакка̄ тулетум̣ гун̣ехи гун̣апа̄рамим̣ гато. йади дуллабханти ратанам̣, нану бхагава̄ дуллабхо пурисасӣхо. йади аномасаттапарибхоганти ратанам̣, нану бхагава̄ аномо сӣлена сама̄дхина̄ пан̃н̃а̄йа вимуттийа̄ вимуттин̃а̄н̣адассанена̄’’ти.

идха пана дуллабхапа̄тубха̄ват̣т̣хена пан̃н̃а̄ ‘‘ратана’’нти вуттам̣. пун̃н̃анти пун̃н̃ачетана̄, са̄ хи арӯпатта̄ парихаритум̣ на сакка̄ти. пат̣хамам̣.