8. джетаванасуттаван̣н̣ана̄

48. ат̣т̣хаме идам̣ хи там̣ джетавананти ана̄тхапин̣д̣ико девапутто джетаванасса чева буддха̄дӣнан̃ча ван̣н̣абхан̣анаттхам̣ а̄гато евама̄ха. исисан̇гханисевитанти бхиккхусан̇гханисевитам̣.

евам̣ пат̣хамага̄тха̄йа джетаванасса ван̣н̣ам̣ катхетва̄ ида̄ни арийамаггасса катхенто каммам̣ виджджа̄тиа̄дима̄ха. таттха камманти маггачетана̄. виджджа̄ти маггапан̃н̃а̄. дхаммоти сама̄дхипаккхика̄ дхамма̄. сӣлам̣ джӣвитамуттаманти сӣле патит̣т̣хитасса джӣвитам̣ уттаманти дассети. атха ва̄ виджджа̄ти дит̣т̣хисан̇каппа̄. дхаммоти ва̄йа̄масатисама̄дхайо. сӣланти ва̄ча̄камманта̄джӣва̄. джӣвитамуттаманти етасмим̣ сӣле т̣хитасса джӣвитам̣ на̄ма уттамам̣. етена мачча̄ суджджхантӣти етена ат̣т̣хан̇гикамаггена сатта̄ висуджджханти.

тасма̄ти йасма̄ маггена суджджханти, на готтадханехи, тасма̄. йонисо вичине дхамманти упа̄йена сама̄дхипаккхийадхаммам̣ вичинеййа. евам̣ таттха висуджджхатӣти евам̣ тасмим̣ арийамагге висуджджхати. атха ва̄ йонисо вичине дхамманти упа̄йена пан̃чаккхандхадхаммам̣ вичинеййа. евам̣ таттха висуджджхатӣти евам̣ тесу чатӯсу саччесу висуджджхати.

ида̄ни са̄рипуттаттхерасса ван̣н̣ам̣ катхенто са̄рипуттова̄тиа̄дима̄ха. таттха са̄рипуттова̄ти авадха̄ран̣авачанам̣, етехи пан̃н̃а̄дӣхи са̄рипуттова сеййоти вадати. упасамена̄ти килесаупасамена. па̄рам̣ гатоти нибба̄нам̣ гато. йо кочи нибба̄нам̣ патто бхиккху, со ета̄вапарамо сийа̄, на тхерена уттаритаро на̄ма аттхӣти вадати. сесам̣ утта̄намева̄ти. ат̣т̣хамам̣.