3. са̄дхусуттаван̣н̣ана̄

33. татийе уда̄нам̣ уда̄несӣти уда̄ха̄рам̣ уда̄хари. йатха̄ хи йам̣ телам̣ ма̄нам̣ гахетум̣ на саккоти виссандитва̄ гаччхати, там̣ авасесакоти вуччати. йан̃ча джалам̣ тал̣а̄кам̣ гахетум̣ на саккоти, аджджхоттхаритва̄ гаччхати, там̣ огхоти вуччати, евамевам̣ йам̣ пӣтивачанам̣ хадайам̣ гахетум̣ на саккоти, адхикам̣ хутва̄ анто асан̣т̣хахитва̄ бахи никкхамати, там̣ уда̄нанти вуччати. еварӯпам̣ пӣтимайам̣ вачанам̣ ниччха̄ресӣти аттхо. саддха̄йапи са̄ху да̄нанти камман̃ча каммапхалан̃ча саддахитва̄пи диннада̄нам̣ са̄ху ладдхакам̣ бхаддакамева. а̄хӯти катхенти. катхам̣ панетам̣ убхайам̣ самам̣ на̄ма хотӣти? джӣвитабхӣруко хи йуджджхитум̣ на саккоти, кхайабхӣруко да̄тум̣ на саккоти. ‘‘джӣвитан̃ча раккхисса̄ми йуджджхисса̄ми ча̄’’ти хи ваданто на йуджджхати. джӣвите пана а̄лайам̣ виссаджджетва̄, ‘‘чхеджджам̣ ва̄ хоту маран̣ам̣ ва̄, ган̣хисса̄метам̣ иссарийа’’нти уссахантова йуджджхати. ‘‘бхоге ча раккхисса̄ми, да̄нан̃ча дасса̄мӣ’’ти ваданто на дада̄ти. бхогесу пана а̄лайам̣ виссаджджетва̄ маха̄да̄нам̣ дасса̄мӣти уссахантова дети. евам̣ да̄нан̃ча йуддхан̃ча самам̣ хоти. кин̃ча бхиййо? аппа̄пи санта̄ бахуке джинантӣти йатха̄ ча йуддхе аппака̄пи вӣрапуриса̄ бахуке бхӣрупурисе джинанти, евам̣ саддха̄дисампанно аппакампи да̄нам̣ даданто бахумаччхерам̣ маддати, бахун̃ча да̄навипа̄кам̣ адхигаччхати. евампи да̄нан̃ча йуддхан̃ча сама̄нам̣. тенева̄ха –

‘‘аппампи че саддаха̄но дада̄ти,

тенева со хоти сукхӣ параттха̄’’ти.

имасса ча панаттхасса пака̄санаттхам̣ екаса̄т̣акабра̄хман̣аваттху ча ан̇кураваттху ча виттха̄ретаббам̣.

дхаммаладдхасса̄ти дхаммена самена ладдхасса бхогасса дхаммаладдхасса ча пуггаласса. еттха пуггало ладдхадхаммо на̄ма адхигатадхаммо арийапуггало. ити йам̣ дхаммаладдхасса бхогасса да̄нам̣ дхаммаладдхасса арийапуггаласса дӣйати, тампи са̄дхӯти аттхо. йо дхаммаладдхасса̄ти имасмимпи га̄тха̄паде айамева аттхо. ут̣т̣ха̄навӣрийа̄дхигатасса̄ти ут̣т̣ха̄нена ча вӣрийена ча адхигатасса бхогасса. ветаран̣инти десана̄сӣсаматтаметам̣. йамасса пана ветаран̣импи сан̃джӣвака̄л̣асутта̄дайопи екатим̣самаха̄нирайепи саббасова атиккамитва̄ти аттхо.

вичеййа да̄нанти вичинитва̄ диннада̄нам̣. таттха две вичинана̄ даккхин̣а̄вичинанам̣ даккхин̣еййавичинанан̃ча. тесу ла̄макала̄маке паччайе апанетва̄ пан̣ӣтапан̣ӣте вичинитва̄ тесам̣ да̄нам̣ даккхин̣а̄вичинанам̣ на̄ма. випаннасӣле ито бахиддха̄ пан̃чанавутипа̄сан̣д̣абхеде ва̄ даккхин̣еййе паха̄йа сӣла̄дигун̣асампанна̄нам̣ са̄сане паббаджита̄нам̣ да̄нам̣ даккхин̣еййавичинанам̣ на̄ма. евам̣ двӣха̄ка̄рехи вичеййа да̄нам̣. сугатаппасаттханти сугатена ван̣н̣итам̣. таттха даккхин̣еййавичинанам̣ дассенто йе даккхин̣еййа̄тиа̄дима̄ха. бӣджа̄ни вутта̄ни йатха̄ти имина̄ пана даккхин̣а̄вичинанам̣ а̄ха. авипаннабӣджасадиса̄ хи вичинитва̄ гахита̄ пан̣ӣтапан̣ӣта̄ деййадхамма̄ти.

па̄н̣есупи са̄дху сам̣йамоти па̄н̣есу сам̣йатабха̄вопи бхаддако. айам̣ девата̄ итара̄хи катхитам̣ да̄на̄нисам̣сам̣ атиккамитва̄ сӣла̄нисам̣сам̣ катхетума̄раддха̄. ахет̣хайам̣ чаранти авихим̣санто чарама̄но. парӯпава̄да̄ти парасса упава̄дабхайена. бхайа̄ти упава̄дабхайа̄. да̄на̄ ча кхо дхаммападам̣ва сеййоти да̄нато нибба̄насан̇кха̄там̣ дхаммападамева сеййо. пуббе ча хи пуббатаре ча сантоти пуббе ча кассапабуддха̄дика̄ле пуббатаре ча кон̣а̄гаманабуддха̄дика̄ле, саббепи ва̄ ете пуббе ча пуббатаре ча санто на̄ма̄ти. татийам̣.