5. арахантасуттаван̣н̣ана̄

25. пан̃чаме ката̄вӣти чатӯхи маггехи катакиччо. ахам̣ вада̄мӣти айам̣ девата̄ ванасан̣д̣ава̄синӣ, са̄ а̄ран̃н̃ака̄нам̣ бхиккхӯнам̣ ‘‘ахам̣ бхун̃джа̄ми, ахам̣ нисӣда̄ми, мама патто, мама чӣвара’’нтиа̄дикатха̄воха̄рам̣ сутва̄ чинтеси – ‘‘ахам̣ име бхиккхӯ ‘кхӣн̣а̄сава̄’ти ман̃н̃а̄ми, кхӣн̣а̄сава̄нан̃ча на̄ма еварӯпа̄ аттупаладдхинисситакатха̄ хоти, на хоти ну кхо’’ти джа̄нанаттхам̣ евам̣ пуччхати.

са̄ман̃н̃анти локанируттим̣ локавоха̄рам̣. кусалоти кхандха̄дӣсу кусало. воха̄раматтена̄ти упаладдхинисситакатхам̣ хитва̄ воха̄рабхедам̣ акаронто ‘‘ахам̣, мама̄’’ти вадеййа. ‘‘кхандха̄ бхун̃джанти, кхандха̄ нисӣданти, кхандха̄нам̣ патто, кхандха̄нам̣ чӣвара’’нти хи вутте воха̄рабхедо хоти, на кочи джа̄на̄ти. тасма̄ евам̣ аватва̄ локавоха̄рена вохаратӣти.

атха девата̄ – ‘‘йади дит̣т̣хийа̄ васена на вадати, ма̄навасена ну кхо вадатӣ’’ти чинтетва̄ пуна йо хотӣти пуччхи. таттха ма̄нам̣ ну кхоти со бхиккху ма̄нам̣ упагантва̄ ма̄навасена вадеййа ну кхоти. атха бхагава̄ – ‘‘айам̣ девата̄ кхӣн̣а̄савам̣ сама̄нам̣ вийа каротӣ’’ти чинтетва̄, ‘‘кхӣн̣а̄савасса нававидхопи ма̄но пахӣно’’ти дассенто пат̣ига̄тхам̣ а̄ха. таттха видхӯпита̄ти видхамита̄. ма̄нагантхасса̄ти ма̄на̄ ча гантха̄ ча асса. ман̃н̃атанти ман̃н̃анам̣. тивидхампи тан̣ха̄-дит̣т̣хи-ма̄на-ман̃н̃анам̣ со вӣтиватто, атиккантоти аттхо. сесам̣ утта̄наттхамева̄ти. пан̃чамам̣.