3. джат̣а̄суттаван̣н̣ана̄

23. татийе антоджат̣а̄ти га̄тха̄йам̣ джат̣а̄ти тан̣ха̄йа джа̄линийа̄ адхивачанам̣. са̄ хи рӯпа̄дӣсу а̄рамман̣есу хет̣т̣хупарийавасена пунаппунам̣ уппаджджанато сам̣сиббанат̣т̣хена вел̣угумба̄дӣнам̣ са̄кха̄джа̄ласан̇кха̄та̄ джат̣а̄ вийа̄ти джат̣а̄. са̄ панеса̄ сакапариккха̄рапарапариккха̄ресу сакааттабха̄ва-парааттабха̄весу аджджхаттика̄йатана-ба̄хира̄йатанесу ча уппаджджанато антоджат̣а̄ бахиджат̣а̄ти вуччати. та̄йа евам̣ уппаджджама̄на̄йа джат̣а̄йа джат̣ита̄ паджа̄. йатха̄ на̄ма вел̣уджат̣а̄дӣхи вел̣уа̄дайо, евам̣ та̄йа тан̣ха̄джат̣а̄йа сабба̄пи айам̣ саттаника̄йасан̇кха̄та̄ паджа̄ джат̣ита̄ винаддха̄, сам̣сиббита̄ти аттхо. йасма̄ ча евам̣ джат̣ита̄, там̣ там̣ готама пуччха̄мӣти тасма̄ там̣ пуччха̄ми. готама̄ти бхагавантам̣ готтена а̄лапати. ко имам̣ виджат̣айе джат̣анти имам̣ евам̣ тедха̄тукам̣ джат̣етва̄ т̣хитам̣ джат̣ам̣ ко виджат̣еййа, виджат̣етум̣ ко саматтхоти пуччхати.

атхасса бхагава̄ таматтхам̣ виссадждженто сӣле патит̣т̣ха̄йа̄тиа̄дима̄ха. таттха сӣле патит̣т̣ха̄йа̄ти чатупа̄рисуддхисӣле т̣хатва̄. еттха ча бхагава̄ джат̣а̄виджат̣анам̣ пуччхито сӣлам̣ а̄рабханто на ‘‘ан̃н̃ам̣ пут̣т̣хо ан̃н̃ам̣ катхетӣ’’ти ведитаббо. джат̣а̄виджат̣акасса хи патит̣т̣ха̄дассанаттхаметтха сӣлам̣ катхитам̣.

нароти сатто. сапан̃н̃оти каммаджатихетукапат̣исандхипан̃н̃а̄йа пан̃н̃ава̄. читтам̣ пан̃н̃ан̃ча бха̄вайанти сама̄дхин̃чева випассанан̃ча бха̄вайама̄но. читтасӣсена хеттха ат̣т̣ха сама̄паттийо катхита̄, пан̃н̃а̄на̄мена випассана̄. а̄та̄пӣти вӣрийава̄. вӣрийан̃хи килеса̄нам̣ а̄та̄панапарита̄панат̣т̣хена ‘‘а̄та̄по’’ти вуччати, тадасса аттхӣти а̄та̄пӣ. нипакоти непаккам̣ вуччати пан̃н̃а̄, та̄йа саманна̄гатоти аттхо. имина̄ падена па̄риха̄рийапан̃н̃ам̣ дассети. па̄риха̄рийапан̃н̃а̄ на̄ма ‘‘айам̣ ка̄ло уддесасса, айам̣ ка̄ло парипуччха̄йа̄’’тиа̄дина̄ найена саббаттха ка̄ра̄пита̄ парихаритаббапан̃н̃а̄. имасмин̃хи пан̃ха̄бйа̄каран̣е тиккхаттум̣ пан̃н̃а̄ а̄гата̄. таттха пат̣хама̄ джа̄типан̃н̃а̄, дутийа̄ випассана̄пан̃н̃а̄, татийа̄ саббакиччапарин̣а̄йика̄ па̄риха̄рийапан̃н̃а̄.

со имам̣ виджат̣айе джат̣анти со имехи сӣла̄дӣхи саманна̄гато бхиккху. йатха̄ на̄ма пурисо патхавийам̣ патит̣т̣ха̄йа суниситам̣ саттхам̣ уккхипитва̄ махантам̣ вел̣угумбам̣ виджат̣еййа, евамевам̣ сӣле патит̣т̣ха̄йа сама̄дхисила̄йам̣ суниситам̣ випассана̄пан̃н̃а̄саттхам̣ вӣрийабалапаггахитена па̄риха̄рийапан̃н̃а̄хаттхена уккхипитва̄ саббампи там̣ аттано санта̄не патитам̣ тан̣ха̄джат̣ам̣ виджат̣еййа сан̃чхиндеййа сампада̄леййа̄ти.

етта̄вата̄ секхабхӯмим̣ катхетва̄ ида̄ни джат̣ам̣ виджат̣етва̄ т̣хитам̣ маха̄кхӣн̣а̄савам̣ дассенто йесантиа̄дима̄ха. евам̣ джат̣ам̣ виджат̣етва̄ т̣хитам̣ кхӣн̣а̄савам̣ дассетва̄ пуна джат̣а̄йа виджат̣анока̄сам̣ дассенто йаттха на̄ман̃ча̄тиа̄дима̄ха. таттха на̄манти чатта̄ро арӯпино кхандха̄. пат̣игхам̣ рӯпасан̃н̃а̄ ча̄ти еттха пат̣игхасан̃н̃а̄васена ка̄мабхаво гахито, рӯпасан̃н̃а̄васена рӯпабхаво. тесу двӣсу гахитесу арӯпабхаво гахитова хоти бхавасан̇кхепена̄ти. еттхеса̄ чхиджджате джат̣а̄ти еттха тебхӯмакават̣т̣асса парийа̄дийанат̣т̣ха̄не еса̄ джат̣а̄ чхиджджати, нибба̄нам̣ а̄гамма чхиджджати нируджджхатӣти айам̣ аттхо дассито хоти. татийам̣.