7. дуккарасуттаван̣н̣ана̄

17. саттаме дуттитиккханти дуккхамам̣ дуадхива̄сийам̣. абйаттена̄ти ба̄лена. са̄ман̃н̃анти саман̣адхаммо. имина̄ девата̄ идам̣ дассети – йам̣ пан̣д̣ита̄ кулапутта̄ дасапи васса̄ни вӣсатипи сат̣т̣хипи васса̄ни данте абхидантама̄дха̄йа дживха̄йа та̄лум̣ а̄хаччапи четаса̄ читтам̣ абхинигган̣хитва̄пи ека̄санам̣ екабхаттам̣ пат̣исевама̄на̄ а̄па̄н̣акот̣икам̣ брахмачарийам̣ чаранта̄ са̄ман̃н̃ам̣ каронти. там̣ бхагава̄ ба̄ло абйатто ка̄тум̣ на саккотӣти. бахӯ хи таттха самба̄дха̄ти тасмим̣ са̄ман̃н̃асан̇кха̄те арийамагге бахӯ самба̄дха̄ магга̄дхигама̄йа пат̣ипаннасса пуббабха̄ге бахӯ париссайа̄ти дассети.

читтан̃че на нива̄райети йади айонисо уппаннам̣ читтам̣ на нива̄реййа, кати аха̄ни са̄ман̃н̃ам̣ чареййа? екадивасампи на чареййа. читтавасико хи саман̣адхаммам̣ ка̄тум̣ на саккоти. паде падети а̄рамман̣е а̄рамман̣е. а̄рамман̣ан̃хи идха паданти адхиппетам̣. йасмим̣ йасмим̣ хи а̄рамман̣е килесо уппаджджати, таттха таттха ба̄ло висӣдати на̄ма. ирийа̄патхападампи ват̣т̣ати. гамана̄дӣсу хи йаттха йаттха килесо уппаджджати, таттха таттхева висӣдати на̄ма. сан̇каппа̄нанти ка̄масан̇каппа̄дӣнам̣.

куммо ва̄ти каччхапо вийа. ан̇га̄нӣти гӣвапан̃чама̄ни ан̇га̄ни. самодаханти самодаханто, самодахитва̄ ва̄. мановитаккети манамхи уппаннавитакке. етта̄вата̄ идам̣ дассети – йатха̄ куммо сон̣д̣ипан̃чама̄ни ан̇га̄ни саке капа̄ле самодаханто син̇га̄ласса ота̄рам̣ на дети, самодахитва̄ часса аппасайхатам̣ а̄паджджати, евамевам̣ бхиккху манамхи уппаннавитакке саке а̄рамман̣акапа̄ле самодахам̣ ма̄расса ота̄рам̣ на дети, самодахитва̄ часса аппасайхатам̣ а̄паджджатӣти. анисситоти тан̣ха̄дит̣т̣хиниссайехи аниссито хутва̄. ахет̣хайа̄ноти авихим̣сама̄но. париниббутоти килесанибба̄нена париниббуто. нӯпавадеййа кан̃чӣти йам̣кин̃чи пуггалам̣ а̄ча̄равипаттиа̄дӣсу йа̄йа ка̄йачи ман̇кум̣ ка̄тука̄мо хутва̄ на вадеййа, ‘‘ка̄лена ваккха̄ми но ака̄лена̄’’тиа̄дайо пана пан̃ча дхамме аджджхаттам̣ упат̣т̣хапетва̄ уллумпанасабха̄васан̣т̣хитена читтена ка̄рун̃н̃атам̣ пат̣ичча вадеййа̄ти.

дуккарасуттаван̣н̣ана̄ нит̣т̣хита̄.