9. ма̄нака̄масуттаван̣н̣ана̄

9. наваме ма̄нака̄масса̄ти ма̄нам̣ ка̄ментасса иччхантасса. дамоти еварӯпасса пуггаласса сама̄дхипаккхико дамо наттхӣти вадати. ‘‘саччена данто дамаса̄ упето, ведантагӯ вуситабрахмачарийо’’ти (сам̣. ни. 1.195) еттха хи индрийасам̣варо дамоти вутто. ‘‘йади сачча̄ дама̄ ча̄га̄, кхантйа̄ бхиййодха виджджатӣ’’ти (сам̣. ни. 1.246; су. ни. 191) еттха пан̃н̃а̄. ‘‘да̄нена дамена сам̣йамена саччаваджджена аттхи пун̃н̃ам̣, аттхи пун̃н̃асса а̄гамо’’ти (сам̣. ни. 4.365) еттха упосатхакаммам̣. ‘‘саккхиссаси кхо твам̣, пун̣н̣а, имина̄ дамӯпасамена саманна̄гато суна̄парантасмим̣ джанападе вихариту’’нти (сам̣. ни. 4.88; ма. ни. 3.396) еттха адхива̄санакханти. имасмим̣ пана сутте дамоти сама̄дхипаккхикадхамма̄нам̣ етам̣ на̄мам̣. тенева̄ха – ‘‘на монаматтхи асама̄хитасса̄’’ти. таттха монанти чатумагган̃а̄н̣ам̣, тан̃хи муна̄тӣти монам̣, чатусаччадхамме джа̄на̄тӣти аттхо. маччудхеййасса̄ти тебхӯмакават̣т̣асса. тан̃хи маччуно патит̣т̣ха̄нат̣т̣хена маччудхеййанти вуччати. па̄ранти тассева па̄рам̣ нибба̄нам̣. тареййа̄ти пат̣ивиджджхеййа па̄пун̣еййа ва̄. идам̣ вуттам̣ хоти – еко аран̃н̃е вихаранто паматто пуггало маччудхеййасса па̄рам̣ на тареййа на пат̣ивиджджхеййа на па̄пун̣еййа̄ти.

ма̄нам̣ паха̄йа̄ти арахаттамаггена нававидхама̄нам̣ паджахитва̄. сусама̄хитаттоти упача̄раппана̄сама̄дхӣхи сут̣т̣ху сама̄хитатто. сучетасоти н̃а̄н̣асампайуттата̄йа сундарачитто. н̃а̄н̣авиппайуттачиттена хи сучетасоти на вуччати, тасма̄ н̃а̄н̣асампайуттена сучетасо хутва̄ти аттхо. саббадхи виппамуттоти саббесу кхандха̄йатана̄дӣсу виппамутто хутва̄. тареййа̄ти еттха тебхӯмакават̣т̣ам̣ саматиккаманто нибба̄нам̣ пат̣ивиджджханто таратӣти пат̣иведхатаран̣ам̣ на̄ма вуттам̣. ити има̄йа га̄тха̄йа тиссо сиккха̄ катхита̄ хонти. катхам̣ – ма̄но на̄ма̄йам̣ сӣлабхедано, тасма̄ ‘‘ма̄нам̣ паха̄йа̄’’ти имина̄ адхисӣласиккха̄ катхита̄ хоти. ‘‘сусама̄хитатто’’ти имина̄ адхичиттасиккха̄. ‘‘сучетасо’’ти еттха читтена пан̃н̃а̄ дассита̄, тасма̄ имина̄ адхипан̃н̃а̄сиккха̄ катхита̄. адхисӣлан̃ча на̄ма сӣле сати хоти, адхичиттам̣ читте сати, адхипан̃н̃а̄ пан̃н̃а̄йа сати. тасма̄ сӣлам̣ на̄ма пан̃чапи дасапи сӣла̄ни, па̄тимоккхасам̣варо адхисӣлам̣ на̄ма̄ти ведитаббам̣. ат̣т̣ха сама̄паттийо читтам̣, випассана̄па̄дакаджджха̄нам̣ адхичиттам̣. каммассакатан̃а̄н̣ам̣ пан̃н̃а̄, випассана̄ адхипан̃н̃а̄. ануппаннепи хи буддхуппа̄де паваттатӣти пан̃часӣлам̣ дасасӣлам̣ сӣламева, па̄тимоккхасам̣варасӣлам̣ буддхуппа̄дейева паваттатӣти адхисӣлам̣. читтапан̃н̃а̄супи есева найо. апича нибба̄нам̣ паттхайантена сама̄диннам̣ пан̃часӣлампи дасасӣлампи адхисӣламева. сама̄панна̄ ат̣т̣ха сама̄паттийопи адхичиттамева. саббампи ва̄ локийасӣлам̣ сӣламева, локуттарам̣ адхисӣлам̣. читтапан̃н̃а̄супи есева найоти. ити има̄йа га̄тха̄йа самодха̄нетва̄ тиссо сиккха̄ сакаласа̄санам̣ катхитам̣ хотӣти.

ма̄нака̄масуттаван̣н̣ана̄ нит̣т̣хита̄.