10. аран̃н̃асуттаван̣н̣ана̄

10. дасаме санта̄нанти сантакилеса̄нам̣, пан̣д̣ита̄нам̣ ва̄. ‘‘санто хаве саббхи паведайанти (джа̄. 2.21.413), дӯре санто пака̄сантӣ’’тиа̄дӣсу (дха. па. 304) хи пан̣д̣ита̄пи сантоти вутта̄. брахмача̄ринанти сет̣т̣хача̄рӣнам̣ маггабрахмачарийава̄сам̣ васанта̄нам̣. кена ван̣н̣о пасӣдатӣти кена ка̄ран̣ена чхавиван̣н̣о пасӣдатӣти пуччхати. касма̄ панеса̄ евам̣ пуччхати? еса̄ кира ванасан̣д̣ава̄сика̄ бхуммадевата̄ а̄ран̃н̃аке бхиккхӯ паччха̄бхаттам̣ пин̣д̣апа̄тапат̣икканте аран̃н̃ам̣ пависитва̄ раттит̣т̣ха̄надива̄т̣т̣ха̄несу мӯлакаммат̣т̣ха̄нам̣ гахетва̄ нисинне пассати. тесан̃ча евам̣ нисинна̄нам̣ балавачиттекаггата̄ уппаджджати. тато висабха̄гасантати вӯпасаммати, сабха̄гасантати оккамати, читтам̣ пасӣдати. читте пасанне лохитам̣ пасӣдати, читтасамут̣т̣ха̄на̄ни упа̄да̄рӯпа̄ни парисуддха̄ни хонти, ван̣т̣а̄ памуттата̄лапхаласса вийа мукхасса ван̣н̣о хоти. там̣ дисва̄ девата̄ чинтеси – ‘‘сарӣраван̣н̣о на̄ма̄йам̣ пан̣ӣта̄ни расасампанна̄ни бходжана̄ни сукхасампхасса̄ни нива̄санапа̄пуран̣асайана̄ни утусукхе тебхӯмика̄дибхеде ча па̄са̄де ма̄ла̄гандхавилепана̄дӣни ча лабханта̄нам̣ пасӣдати, име пана бхиккхӯ пин̣д̣а̄йа чаритва̄ миссакабхаттам̣ бхун̃джанти, вирал̣аман̃чаке ва̄ пхалаке ва̄ сила̄йа ва̄ сайана̄ни каппенти, руккхамӯла̄дӣсу ва̄ аббхока̄се ва̄ васанти, кена ну кхо ка̄ран̣ена етесам̣ ван̣н̣о пасӣдатӣ’’ти. тасма̄ пуччхи.

атхасса̄ бхагава̄ ка̄ран̣ам̣ катхенто дутийам̣ га̄тхам̣ а̄ха. таттха атӣтанти атӣте асуко на̄ма ра̄джа̄ дхаммико ахоси, со амха̄кам̣ пан̣ӣте паччайе ада̄си. а̄чарийупаджджха̄йа̄ ла̄бхино ахесум̣. атха майам̣ еварӯпа̄ни бходжана̄ни бхун̃джимха̄, чӣвара̄ни па̄рупимха̄ти евам̣ екачче паччайаба̄хуллика̄ вийа име бхиккхӯ атӣтам̣ на̄нусочанти. наппаджаппанти на̄гатанти ана̄гате дхаммико ра̄джа̄ бхависсати, пхӣта̄ джанапада̄ бхависсанти, бахӯни саппинаванӣта̄дӣни уппаджджиссанти, ‘‘кха̄датха бхун̃джатха̄’’ти таттха таттха ватта̄ро бхависсанти, тада̄ майам̣ еварӯпа̄ни бходжана̄ни бхун̃джисса̄ма, чӣвара̄ни па̄руписса̄ма̄ти евам̣ ана̄гатам̣ на паттхенти. паччуппаннена̄ти йена кеначи тан̇кхан̣е ладдхена йа̄пенти. тена̄ти тена тивидхена̄пи ка̄ран̣ена.

евам̣ ван̣н̣асампаттим̣ дассетва̄ ида̄ни тассева ван̣н̣асса вина̄сам̣ дассенто анантарам̣ га̄тхама̄ха. таттха ана̄гатаппаджаппа̄йа̄ти ана̄гатасса паттхана̄йа. етена̄ти етена ка̄ран̣адвайена. нал̣ова харито лутоти йатха̄ харито нал̣о ла̄йитва̄ ун̣хапа̄са̄н̣е паккхитто суссати, евам̣ суссантӣти.

аран̃н̃асуттаван̣н̣ана̄ нит̣т̣хита̄. нал̣авагго пат̣хамо.