4. аччентисуттаван̣н̣ана̄

4. чатуттхе аччентӣти атиккаманти. ка̄ла̄ти пуребхатта̄дайо ка̄ла̄. тарайанти раттийоти раттийо атиккамама̄на̄ пуггалам̣ маран̣ӯпагамана̄йа тарайанти сӣгхам̣ сӣгхам̣ гамайанти. вайогун̣а̄ти пат̣хамамаджджхимапаччхимавайа̄нам̣ гун̣а̄, ра̄сайоти аттхо. ‘‘ануджа̄на̄ми, бхиккхаве, ахата̄нам̣ ваттха̄нам̣ дигун̣ам̣ сан̇гха̄т̣и’’нти (маха̄ва. 348) еттха хи пат̣алат̣т̣хо гун̣ат̣т̣хо. ‘‘сатагун̣а̄ даккхин̣а̄ па̄т̣икан̇кхитабба̄’’ти (ма. ни. 3.379) еттха а̄нисам̣сат̣т̣хо. ‘‘антам̣ антагун̣а’’нти еттха кот̣т̣ха̄сат̣т̣хо. ‘‘кайира̄ ма̄ла̄гун̣е бахӯ’’ти (дха. па. 53) еттха ра̄сат̣т̣хо. ‘‘пан̃ча ка̄магун̣а̄’’ти еттха бандханат̣т̣хо. идха пана ра̄сат̣т̣хо гун̣ат̣т̣хо. тасма̄ вайогун̣а̄ти вайора̄сайо ведитабба̄. анупуббам̣ джахантӣти анупат̣ипа̄т̣ийа̄ пуггалам̣ джаханти. маджджхимавайе т̣хитам̣ хи пат̣хамавайо джахати, паччхимавайе т̣хитам̣ две пат̣хамамаджджхима̄ джаханти, маран̣аккхан̣е пана тайопи вайа̄ джахантева. етам̣ бхайанти етам̣ ка̄ла̄нам̣ атиккаманам̣, раттидива̄нам̣ таритабха̄во, вайогун̣а̄нам̣ джаханабха̄воти тивидхам̣ бхайам̣. сесам̣ пуримасадисамева̄ти.

аччентисуттаван̣н̣ана̄ нит̣т̣хита̄.