5. катичхиндасуттаван̣н̣ана̄

5. пан̃чаме кати чхиндети чхинданто кати чхиндеййа. сесападесупи есева найо. еттха ча ‘‘чхинде джахе’’ти аттхато екам̣. га̄тха̄бандхасса пана мат̣т̣хабха̄ваттхам̣ айам̣ девата̄ саддапунаруттим̣ ваджджайантӣ евама̄ха. кати сан̇га̄тиготи кати сан̇ге атигато, атиккантоти аттхо. сан̇га̄тикотипи па̄т̣хо, айамева аттхо. пан̃ча чхиндети чхинданто пан̃ча орамбха̄гийасам̣йоджана̄ни чхиндеййа. пан̃ча джахети джаханто пан̃чуддхамбха̄гийасам̣йоджана̄ни джахеййа. идха̄пи чхинданан̃ча джаханан̃ча аттхато екамева, бхагава̄ пана девата̄йа а̄ропитавачана̄нурӯпенева евама̄ха. атха ва̄ па̄десу баддхапа̄сасакун̣о вийа пан̃чорамбха̄гийасам̣йоджана̄ни хет̣т̣ха̄ а̄кад̣д̣хама̄на̄ка̄ра̄ни хонти, та̄ни ана̄га̄мимаггена чхиндеййа̄ти вадати. хаттхехи гахитаруккхаса̄кха̄ вийа пан̃чуддхамбха̄гийасам̣йоджана̄ни упари а̄кад̣д̣хама̄на̄ка̄ра̄ни хонти, та̄ни арахаттамаггена джахеййа̄ти вадати. пан̃ча чуттари бха̄вайети етесам̣ сам̣йоджана̄нам̣ чхинданаттха̄йа чева паха̄наттха̄йа ча уттари атирекам̣ висесам̣ бха̄венто саддха̄пан̃чама̄ни индрийа̄ни бха̄веййа̄ти аттхо. пан̃ча сан̇га̄тиготи ра̄гасан̇го досасан̇го мохасан̇го ма̄насан̇го дит̣т̣хисан̇готи име пан̃ча сан̇ге атикканто. огхатин̣н̣оти вуччатӣти чатурогхатин̣н̣оти катхӣйати. има̄йа пана га̄тха̄йа пан̃чиндрийа̄ни локийалокуттара̄ни катхита̄нӣти.

катичхиндасуттаван̣н̣ана̄ нит̣т̣хита̄.