3. саппурисадхаммасуттаван̣н̣ана̄

105. евам̣ ме сутанти саппурисадхаммасуттам̣. таттха саппурисадхамманти саппуриса̄нам̣ дхаммам̣. асаппурисадхамманти па̄папуриса̄нам̣ дхаммам̣. евам̣ ма̄тикам̣ т̣хапетва̄пи пуна йатха̄ на̄ма маггакусало пурисо ва̄мам̣ мун̃читва̄ даккхин̣ам̣ ган̣ха̄ти. пат̣хамам̣ мун̃читаббам̣ катхети, евам̣ паха̄таббам̣ дхаммам̣ пат̣хамам̣ десенто катамо ча, бхиккхаве, асаппурисадхаммотиа̄дима̄ха. таттха учча̄кула̄ти кхаттийакула̄ ва̄ бра̄хман̣акула̄ ва̄. етадева хи куладвайам̣ ‘‘учча̄кула’’нти вуччати. со таттха пуджджоти со бхиккху тесу бхиккхӯсу пӯджа̄рахо. антарам̣ каритва̄ти аббхантарам̣ катва̄.

маха̄кула̄ти кхаттийакула̄ ва̄ бра̄хман̣акула̄ ва̄ вессакула̄ ва̄. идамева хи кулаттайам̣ ‘‘маха̄кула’’нти вуччати. маха̄бхогакула̄ти махантехи бхогехи саманна̄гата̄ кула̄. ул̣а̄рабхогакула̄ти ул̣а̄рехи пан̣ӣтехи бхогехи сампаннакула̄. имасмим̣ пададвайе чатта̄рипи кула̄ни лаббханти. йаттха каттхачи куле джа̄то хи пун̃н̃абалехи маха̄бхогопи ул̣а̄рабхогопи хотийева.

106. йасассӣти парива̄расампанно. аппан̃н̃а̄та̄ти раттим̣ кхиттасара̄ вийа сан̇гхамаджджха̄дӣсу на пан̃н̃а̄йанти. аппесаккха̄ти аппапарива̄ра̄.

107. а̄ран̃н̃икоти сама̄диннаа̄ран̃н̃икадхутан̇го. сесадхутан̇гесупи есева найо. имасмин̃ча сутте па̄л̣ийам̣ навева дхутан̇га̄ни а̄гата̄ни, виттха̄рена панета̄ни тераса хонти. тесу йам̣ ваттаббам̣, там̣ саббам̣ сабба̄ка̄рена висуддхимагге дхутан̇ганиддесе вуттамева.

108. атаммайата̄ти таммайата̄ вуччати тан̣ха̄, ниттан̣ха̄ти аттхо. атаммайатан̃н̃ева антарам̣ каритва̄ти ниттан̣хатам̣йева ка̄ран̣ам̣ катва̄ аббхантарам̣ ва̄ катва̄, читте уппа̄детва̄ти аттхо.

ниродхава̄ре йасма̄ ана̄га̄микхӣн̣а̄сава̄ва там̣ сама̄паттим̣ сама̄паджджанти, путхуджджанасса са̄ наттхи, тасма̄ асаппурисава̄ро парихӣно. на кан̃чи ман̃н̃атӣти кан̃чи пуггалам̣ тӣхи ман̃н̃ана̄хи на ман̃н̃ати. на кухин̃чи ман̃н̃атӣти кисмин̃чи ока̄се на ман̃н̃ати. на кеначи ман̃н̃атӣти кеначи ваттхуна̄пи там̣ пуггалам̣ на ман̃н̃ати. сесам̣ саббаттха утта̄намева̄ти.

папан̃часӯданийа̄ маджджхиманика̄йат̣т̣хакатха̄йа

саппурисадхаммасуттаван̣н̣ана̄ нит̣т̣хита̄.