4. севитабба̄севитаббасуттаван̣н̣ана̄

109. евам̣ ме сутанти севитабба̄севитаббасуттам̣. таттха тан̃ча ан̃н̃аман̃н̃ам̣ ка̄йасама̄ча̄ранти ан̃н̃ам̣ севитаббам̣ ка̄йасама̄ча̄рам̣, ан̃н̃ам̣ асевитаббам̣ вада̄ми, севитаббамева кеначи парийа̄йена асевитаббанти, асевитаббам̣ ва̄ севитаббанти ча на вада̄мӣти аттхо. вачӣсама̄ча̄ра̄дӣсу есева найо. ити бхагава̄ саттахи падехи ма̄тикам̣ т̣хапетва̄ виттха̄рато авибхаджитва̄ва десанам̣ нит̣т̣ха̄песи. касма̄? са̄рипуттаттхерасса ока̄сакаран̣аттхам̣.

113. маносама̄ча̄ре миччха̄дит̣т̣хисамма̄дит̣т̣хийо дит̣т̣хипат̣ила̄бхавасена висум̣ ан̇гам̣ хутва̄ т̣хита̄ти на гахита̄.

114. читтуппа̄де акаммапатхаппатта̄ абхиджджха̄дайо ведитабба̄.

115. сан̃н̃а̄пат̣ила̄бхава̄ре абхиджджха̄сахагата̄йа сан̃н̃а̄йа̄тиа̄дӣни ка̄масан̃н̃а̄дӣнам̣ дассанаттхам̣ вутта̄ни.

117. сабйа̄баджджханти садуккхам̣. апаринит̣т̣хитабха̄ва̄йа̄ти бхава̄нам̣ апаринит̣т̣хитабха̄ва̄йа. еттха ча сабйа̄баджджхаттабха̄ва̄ на̄ма чатта̄ро хонти. путхуджджанопи хи йо тенаттабха̄вена бхавам̣ паринит̣т̣ха̄петум̣ на саккоти, тасса пат̣исандхито пат̣т̣ха̄йа акусала̄ дхамма̄ вад̣д̣ханти, кусала̄ дхамма̄ ча париха̄йанти, садуккхамева аттабха̄вам̣ абхиниббаттети на̄ма. татха̄ сота̄паннасакада̄га̄миана̄га̄мино. путхуджджана̄дайо та̄ва хонту, ана̄га̄мӣ катхам̣ сабйа̄баджджхам̣ аттабха̄вам̣ абхиниббаттети, катхан̃часса акусала̄ дхамма̄ абхивад̣д̣ханти, кусала̄ дхамма̄ париха̄йантӣти. ана̄га̄мӣпи хи суддха̄ва̄се ниббатто уййа̄навима̄накаппаруккхе олокетва̄ ‘‘ахо сукхам̣ ахо сукха’’нти уда̄нам̣ уда̄нети, ана̄га̄мино бхавалобхо бхаватан̣ха̄ аппахӣна̄ва хонти, тасса аппахӣнатан̣хата̄йа акусала̄ вад̣д̣ханти на̄ма, кусала̄ париха̄йанти на̄ма, садуккхамева аттабха̄вам̣ абхиниббаттети, апаринит̣т̣хитабхавойева хотӣти ведитаббо.

абйа̄баджджханти адуккхам̣. айампи чатуннам̣ джана̄нам̣ васена ведитаббо. йо хи путхуджджанопи тенаттабха̄вена бхавам̣ паринит̣т̣ха̄петум̣ саккоти, пуна пат̣исандхим̣ на ган̣ха̄ти, тасса пат̣исандхиггахан̣ато пат̣т̣ха̄йа акусала̄ париха̄йанти, кусала̄йева вад̣д̣ханти, адуккхамева аттабха̄вам̣ ниббаттети, паринит̣т̣хитабхавойева на̄ма хоти. татха̄ сота̄паннасакада̄га̄миана̄га̄мино. сота̄панна̄дайо та̄ва хонту, путхуджджано катхам̣ абйа̄баджджхааттабха̄вам̣ ниббаттети, катхан̃часса акусалапариха̄ниа̄дӣни хонтӣти. путхуджджанопи паччхимабхавико тенаттабха̄вена бхавам̣ паринит̣т̣ха̄петум̣ саматтхо хоти. тасса ан̇гулима̄ласса вийа екенӯнапа̄н̣асахассам̣ гха̄тентасса̄пи аттабха̄во абйа̄баджджхойева на̄ма, бхавам̣ паринит̣т̣ха̄петийева на̄ма. акусаламева ха̄йати, випассанамева габбхам̣ ган̣ха̄пети на̄ма.

119. чаккхувин̃н̃еййантиа̄дӣсу йасма̄ екаччасса тасмим̣йева рӯпе ра̄га̄дайо уппаджджанти, абхинандати асса̄дети, абхинанданто асса̄денто анайабйасанам̣ па̄пун̣а̄ти, екаччасса нуппаджджанти, ниббиндати вираджджати, ниббинданто вираджджанто ниббутим̣ па̄пун̣а̄ти, тасма̄ ‘‘тан̃ча ан̃н̃аман̃н̃а’’нти на вуттам̣. еса найо саббаттха.

евам̣ виттха̄рена аттхам̣ а̄джа̄неййунти еттха ке бхагавато имасса бха̄ситасса аттхам̣ а̄джа̄нанти, ке на а̄джа̄нантӣти? йе та̄ва имасса суттасса па̄л̣ин̃ча ат̣т̣хакатхан̃ча угган̣хитва̄ таккара̄ на хонти, йатха̄вуттам̣ ануломапат̣ипадам̣ на пат̣ипаджджанти, те на а̄джа̄нанти на̄ма. йе пана таккара̄ хонти, йатха̄вуттам̣ ануломапат̣ипадам̣ пат̣ипаджджанти, те а̄джа̄нанти на̄ма. евам̣ сантепи сапат̣исандхика̄нам̣ та̄ва дӣгхараттам̣ хита̄йа сукха̄йа хоту, аппат̣исандхика̄нам̣ катхам̣ хотӣти. аппат̣исандхика̄ анупа̄да̄на̄ вийа джа̄таведа̄ паринибба̄йанти, каппасатасахасса̄нампи аччайена тесам̣ пуна дуккхам̣ на̄ма наттхи. ити екам̣сена тесам̣йева дӣгхараттам̣ хита̄йа сукха̄йа хоти. сесам̣ саббаттха утта̄намева̄ти.

папан̃часӯданийа̄ маджджхиманика̄йат̣т̣хакатха̄йа

севитабба̄севитаббасуттаван̣н̣ана̄ нит̣т̣хита̄.