8. ба̄хитикасуттаван̣н̣ана̄

358. евам̣ ме сутанти ба̄хитикасуттам̣. таттха екапун̣д̣арӣкам̣ на̄ганти евам̣на̄макам̣ хаттхим̣. тасса кира пха̄сука̄нам̣ упари та̄лапхаламаттам̣ пан̣д̣арат̣т̣ха̄нам̣ аттхи, тенасса екапун̣д̣арӣкоти на̄мам̣ акам̣су. сиривад̣д̣хам̣ маха̄маттанти паччекахаттхим̣ абхирухитва̄ катха̄пха̄сукаттхам̣ саддхим̣ гаччхантам̣ евам̣на̄макам̣ маха̄маттам̣. а̄йасма̄ноти еттха ноти пуччха̄йа нипа̄то. маха̄матто тхерасса сан̇гха̄т̣ипаттадха̄ран̣а̄ка̄рам̣ саллаккхетва̄ ‘‘евам̣, маха̄ра̄джа̄’’ти а̄ха.

359. опа̄рамбхоти упа̄рамбхам̣ досам̣ а̄ропана̄рахо. ким̣ пуччха̄мӣти ра̄джа̄ пуччхати. сундариваттхусмим̣ уппаннамидам̣ суттам̣, там̣ пуччха̄мӣти пуччхати. йан̃хи майам̣, бхантети, бханте, йам̣ майам̣ вин̃н̃ӯхӣти идам̣ падам̣ гахетва̄ пан̃хена парипӯретум̣ на̄саккхимха̄, там̣ ка̄ран̣ам̣ а̄йасмата̄ евам̣ вадантена парипӯритам̣.

360. акусалоти акосалласамбхӯто. са̄ваджджоти садосо. сабйа̄баджджхоти садуккхо. дуккхавипа̄коти идха ниссандавипа̄ко катхито. тасса̄ти тасса евам̣ аттабйа̄ба̄дха̄дӣнам̣ аттха̄йа паваттака̄йасама̄ча̄расса.

сабба̄кусаладхаммапахӣно кхо, маха̄ра̄джа, татха̄гато кусаладхаммасаманна̄гатоти еттха саббесам̣йева акусала̄нам̣ дхамма̄нам̣ паха̄нам̣ ван̣н̣етӣти. а̄ма ван̣н̣етӣти вутте йатха̄ пуччха̄, татха̄ аттхо вутто бхавеййа. евам̣ бйа̄каран̣ам̣ пана на бха̄рийам̣. аппахӣнаакусалопи хи паха̄нам̣ ван̣н̣еййа, бхагава̄ пана пахӣна̄кусалата̄йа йатха̄ка̄рӣ татха̄ва̄дӣти дассетум̣ евам̣ бйа̄ка̄си. суккапаккхепи есева найо.

362. ба̄хитика̄ти ба̄хитират̣т̣хе ут̣т̣хитаваттхассетам̣ на̄мам̣. сол̣асасама̄ а̄йа̄мена̄ти а̄йа̄мена самасол̣асахаттха̄. ат̣т̣хасама̄ виттха̄рена̄ти виттха̄рена самаат̣т̣хахаттха̄.

363. бхагавато па̄да̄сӣти бхагавато ниййа̄теси. датва̄ ча пана гандхакут̣ийам̣ вита̄нам̣ катва̄ бандхи. тато пат̣т̣ха̄йа гандхакут̣и бхиййосоматта̄йа собхи. сесам̣ саббаттха утта̄намева. неййапуггаласса пана васена айам̣ десана̄ нит̣т̣хита̄ти.

папан̃часӯданийа̄ маджджхиманика̄йат̣т̣хакатха̄йа

ба̄хитикасуттаван̣н̣ана̄ нит̣т̣хита̄.