1. тевиджджаваччхасуттаван̣н̣ана̄

185. евам̣ ме сутанти тевиджджаваччхасуттам̣. таттха екапун̣д̣арӣкети пун̣д̣арӣко вуччати сетамбаруккхо, со тасмим̣ а̄ра̄ме еко пун̣д̣арӣко аттхӣти екапун̣д̣арӣко. етадахосӣти таттха пависитука̄мата̄йа ахоси. чирассам̣ кхо, бхантети пакатийа̄ а̄гатапуббатам̣ упа̄да̄йа. дхаммасса ча̄нудхамманти идха саббан̃н̃утан̃н̃а̄н̣ам̣ дхаммо на̄ма, маха̄джанасса бйа̄каран̣ам̣ анудхаммо на̄ма. сесам̣ джӣвакасутте (ма. ни. 2.51 а̄дайо) вуттанайамева. на ме тети ананун̃н̃а̄йа т̣хатва̄ анун̃н̃ампи пат̣иккхипати. ‘‘саббан̃н̃ӯ саббадасса̄вӣ апарисесам̣ н̃а̄н̣адассанам̣ пат̣иджа̄на̄тӣ’’ти хи идам̣ ануджа̄нитаббам̣ сийа̄, – ‘‘чарато ча ме…пе… паччупат̣т̣хита’’нти идам̣ пана на̄нуджа̄нитаббам̣. саббан̃н̃утан̃н̃а̄н̣ена хи а̄ваджджитва̄ паджа̄на̄ти. тасма̄ ананун̃н̃а̄йа т̣хатва̄ анун̃н̃ампи пат̣иккхипанто евама̄ха.

186. а̄сава̄нам̣ кхайа̄ти еттха саким̣ кхӣн̣а̄нам̣ а̄сава̄нам̣ пуна кхепетабба̄бха̄ва̄ йа̄вадева̄ти на вуттам̣. пуббенива̄сан̃а̄н̣ена четтха бхагава̄ атӣтаджа̄нанагун̣ам̣ дассети, диббачаккхун̃а̄н̣ена паччуппаннаджа̄нанагун̣ам̣, а̄саваккхайан̃а̄н̣ена локуттарагун̣анти. ити има̄хи тӣхи виджджа̄хи сакалабуддхагун̣е сам̣кхипитва̄ катхеси.

гихисам̣йоджананти гихибандханам̣ гихипариккха̄ресу никантим̣. наттхи кхо ваччха̄ти гихисам̣йоджанам̣ аппаха̄йа дуккхассантакаро на̄ма наттхи. йепи хи сантатимаха̄матто уггасено сет̣т̣хипутто вӣтасокада̄ракоти гихилин̇ге т̣хита̄ва арахаттам̣ патта̄, тепи маггена саббасан̇кха̄ресу никантим̣ суккха̄петва̄ патта̄. там̣ патва̄ пана на тена лин̇гена ат̣т̣хам̣су, гихилин̇гам̣ на̄метам̣ хӣнам̣, уттамагун̣ам̣ дха̄ретум̣ на саккоти. тасма̄ таттха т̣хито арахаттам̣ патва̄ там̣дивасамева паббаджати ва̄ паринибба̄ти ва̄. бхӯмадевата̄ пана тит̣т̣ханти. касма̄? нилӣйанока̄сасса аттхита̄йа. сесака̄мабхаве мануссесу сота̄панна̄дайо тайо тит̣т̣ханти, ка̄ма̄вачарадевесу сота̄панна̄ сакада̄га̄мино ча, ана̄га̄микхӣн̣а̄сава̄ панеттха на тит̣т̣ханти. касма̄? тан̃хи т̣ха̄нам̣ лал̣итаджанасса а̄ва̄со, наттхи таттха тесам̣ павивека̄рахам̣ пат̣иччханнат̣т̣ха̄нан̃ча. ити таттха кхӣн̣а̄саво паринибба̄ти, ана̄га̄мӣ чавитва̄ суддха̄ва̄се ниббаттати. ка̄ма̄вачарадевато упари пана чатта̄ропи арийа̄ тит̣т̣ханти.

сопа̄си каммава̄дӣти сопи каммава̄дӣ ахоси, кирийампи на пат̣иба̄хиттха. тан̃хи еканавутикаппаматтхаке атта̄нам̣йева гахетва̄ катхети. тада̄ кира маха̄сатто па̄сан̣д̣апаригган̣ханаттхам̣ паббаджито тассапи па̄сан̣д̣асса ниппхалабха̄вам̣ джа̄нитва̄ вӣрийам̣ на ха̄песи, кирийава̄дӣ хутва̄ сагге ниббаттати. тасма̄ евама̄ха. сесам̣ саббаттха утта̄намева̄ти.

папан̃часӯданийа̄ маджджхиманика̄йат̣т̣хакатха̄йа

тевиджджаваччхасуттаван̣н̣ана̄ нит̣т̣хита̄.