9. бахуведанӣйасуттаван̣н̣ана̄

88. евам̣ ме сутанти бахуведанӣйасуттам̣. таттха пан̃чакан̇го тхапатӣти пан̃чакан̇готи тасса на̄мам̣. ва̄сипхарасуникха̄данадан̣д̣амуггарака̄л̣асуттана̄л̣исан̇кха̄техи ва̄ ан̇гехи саманна̄гататта̄ со пан̃чан̇готи пан̃н̃а̄то. тхапатӣти вад̣д̣хакӣджет̣т̣хако. уда̄йӣти пан̣д̣итауда̄йиттхеро.

89. парийа̄йанти ка̄ран̣ам̣. двепа̄нанда̄ти двепи, а̄нанда. парийа̄йена̄ти ка̄ран̣ена. еттха ча ка̄йикачетасикавасена две ведитабба̄. сукха̄дивасена тиссо, индрийавасена сукхиндрийа̄дика̄ пан̃ча, два̄равасена чаккхусампхассаджа̄дика̄ чха, упавича̄равасена ‘‘чаккхуна̄ рӯпам̣ дисва̄ соманассат̣т̣ха̄нийам̣ рӯпам̣ упавичаратӣ’’тиа̄дика̄ ат̣т̣ха̄раса, чха гехассита̄ни соманасса̄ни, чха неккхаммасита̄ни соманасса̄ни, чха гехассита̄ни доманасса̄ни, чха неккхаммасита̄ни доманасса̄ни, чха гехассита̄ упеккха̄, чха неккхаммасита̄ти евам̣ чхаттим̣са, та̄ атӣте чхаттим̣са, ана̄гате чхаттим̣са, паччуппанне чхаттим̣са̄ти евам̣ ат̣т̣хаведана̄сатам̣ ведитаббам̣.

90. пан̃ча кхо име, а̄нанда, ка̄магун̣а̄ти айам̣ па̄т̣иекко анусандхи. на кевалампи две а̄дим̣ катва̄ ведана̄ бхагавата̄ пан̃н̃атта̄, парийа̄йена ека̄пи ведана̄ катхита̄. там̣ дассенто пан̃чакан̇гасса тхапатино ва̄дам̣ упаттхамбхетум̣ имам̣ десанам̣ а̄рабхи.

абхиккантатаранти сундаратарам̣. пан̣ӣтатаранти атаппакатарам̣. еттха ча чатуттхаджджха̄нато пат̣т̣ха̄йа адуккхамасукха̄ ведана̄, са̄пи сантат̣т̣хена пан̣ӣтат̣т̣хена ча сукханти вутта̄. чха гехассита̄ни сукханти вутта̄ни. ниродхо аведайитасукхавасена сукхам̣ на̄ма джа̄то. пан̃чака̄магун̣авасена хи ат̣т̣хасама̄паттивасена ча уппаннам̣ ведайитасукхам̣ на̄ма. ниродхо аведайитасукхам̣ на̄ма. ити ведайитасукхам̣ ва̄ хоту аведайитасукхам̣ ва̄, там̣ ниддуккхабха̄васан̇кха̄тена сукхат̣т̣хена екантасукхамева джа̄там̣.

91. йаттха йаттха̄ти йасмим̣ йасмим̣ т̣ха̄не. сукхам̣ упалаббхатӣти ведайитасукхам̣ ва̄ аведайитасукхам̣ ва̄ упалаббхати. там̣ там̣ татха̄гато сукхасмим̣ пан̃н̃апетӣти там̣ саббам̣ татха̄гато ниддуккхабха̄вам̣ сукхасмим̣йева пан̃н̃апетӣти. идха бхагава̄ ниродхасама̄паттим̣ сӣсам̣ катва̄ неййапуггалавасена арахаттаникӯт̣енева десанам̣ нит̣т̣ха̄песӣти.

папан̃часӯданийа̄ маджджхиманика̄йат̣т̣хакатха̄йа

бахуведанӣйасуттаван̣н̣ана̄ нит̣т̣хита̄.