5. анума̄насуттаван̣н̣ана̄

181. евам̣ ме сутанти анума̄насуттам̣. таттха бхаггесӯти евам̣на̄маке джанападе, вачанаттхо панеттха вутта̄нуса̄ренева ведитаббо. сусума̄рагирети евам̣на̄маке нагаре. тасса кира нагарасса ваттхупариггахадивасе авидӯре удакарахаде сум̣сума̄ро саддамака̄си, гирам̣ ниччха̄реси. атха нагаре нит̣т̣хите сум̣сума̄рагирам̣ твевасса на̄мам̣ акам̣су. бхесакал̣а̄ванети бхесакал̣а̄на̄маке ване. ‘‘бхесагал̣а̄ване’’типи па̄т̣хо. мигада̄йети там̣ ванам̣ мигапаккхӣнам̣ абхайадиннат̣т̣ха̄не джа̄там̣, тасма̄ мигада̄йоти вуччати.

пава̄ретӣти иччха̄пети. вадантӯти ова̄да̄нуса̄санивасена ваданту, ануса̄сантӯти аттхо. вачанӣйомхӣти ахам̣ тумхехи ваттаббо, ануса̄ситаббо овадитабботи аттхо. со ча хоти дуббачоти со ча дуккхена ваттаббо хоти, вутто на сахати. довачассакаран̣ехӣти дуббачабха̄вака̄ракехи упари а̄гатехи сол̣асахи дхаммехи. аппадаккхин̣агга̄хӣ ануса̄санинти йо хи вуччама̄но тумхе мам̣ касма̄ вадатха, ахам̣ аттано каппийа̄каппийам̣ са̄ваджджа̄наваджджам̣ аттха̄наттхам̣ джа̄на̄мӣти вадати. айам̣ ануса̄саним̣ падаккхин̣ато на ган̣ха̄ти, ва̄мато ган̣ха̄ти, тасма̄ аппадаккхин̣агга̄хӣти вуччати.

па̄пика̄нам̣ иччха̄нанти ла̄мака̄нам̣ асантасамбхаванапаттхана̄нам̣. пат̣иппхаратӣти пат̣ивируддхо, паччанӣко хутва̄ тит̣т̣хати, апаса̄детӣти ким̣ ну кхо туйхам̣ ба̄ласса абйаттасса бхан̣итена, твампи на̄ма бхан̣итаббам̣ ман̃н̃иссасӣти евам̣ гхат̣т̣ети. пачча̄ропетӣти, твампи кхоси иттханна̄мам̣ а̄паттим̣ а̄панно, там̣ та̄ва пат̣икарохӣти евам̣ пат̣иа̄ропети.

ан̃н̃енан̃н̃ам̣ пат̣ичаратӣти ан̃н̃ена ка̄ран̣ена вачанена ва̄ ан̃н̃ам̣ ка̄ран̣ам̣ вачанам̣ ва̄ пат̣иччха̄дети. ‘‘а̄паттим̣ а̄панносӣ’’ти вутте ‘‘ко а̄панно, ким̣ а̄панно, кисмим̣ а̄панно, кам̣ бхан̣атха, ким̣ бхан̣атха̄’’ти ва̄ вадати. ‘‘еварӯпам̣ кин̃чи тайа̄ дит̣т̣ха’’нти вутте ‘‘на сун̣а̄мӣ’’ти сотам̣ ва̄ упанети. бахиддха̄ катхам̣ апана̄метӣти ‘‘иттханна̄мам̣ а̄паттим̣ а̄панносӣ’’ти пут̣т̣хо ‘‘па̄т̣алипуттам̣ гатомхӣ’’ти ватва̄ пуна ‘‘на тава па̄т̣алипуттагаманам̣ пуччха̄ма, а̄паттим̣ пуччха̄ма̄’’ти вутте ‘‘тато ра̄джагехам̣ гатомхӣ’’ти, ра̄джагехам̣ ва̄ йа̄хи бра̄хман̣агехам̣ ва̄, а̄паттим̣ а̄панносӣти. таттха ме сӯкарамам̣сам̣ ладдхантиа̄дӣни ваданто катхам̣ бахиддха̄ виккхипати.

апада̄нети аттано чарийа̄йа. на сампа̄йатӣти, а̄вусо, твам̣ кухим̣ васаси, кам̣ нисса̄йа васасӣти ва̄, йам̣ твам̣ вадеси ‘‘майа̄ еса а̄паттим̣ а̄паджджанно дит̣т̣хо’’ти. твам̣ тасмим̣ самайе ким̣ кароси, айам̣ ким̣ кароти, каттха ва̄ твам̣ аччхаси каттха ва̄ айантиа̄дина̄ найена чарийам̣ пут̣т̣хо сампа̄детва̄ катхетум̣ на саккоти.

183. татра̄вусоти, а̄вусо, тесу сол̣асасу дхаммесу. аттана̄ва атта̄нам̣ евам̣ ануминитаббанти евам̣ аттана̄ва атта̄ ануметаббо тулетаббо тӣретаббо.

184. паччавеккхитаббанти паччавеккхитаббо. ахоратта̄нусиккхина̄ти дива̄пи раттимпи сиккхантена, ратин̃ча дива̄ ча кусалесу дхаммесу сиккхантена пӣтипа̄моджджамева уппа̄детаббанти аттхо.

аччхе ва̄ удакапаттети пасанне ва̄ удакабха̄джане. мукханимиттанти мукхапат̣ибимбам̣. раджанти а̄гантукараджам̣. ан̇ган̣анти таттха джа̄такам̣ тилакам̣ ва̄ пил̣акам̣ ва̄. саббепиме па̄паке акусале дхамме пахӣнети имина̄ саббаппаха̄нам̣ катхеси. катхам̣? еттака̄ акусала̄ дхамма̄ паббаджитасса на̄нуччхавика̄ти пат̣исан̇кха̄нам̣ уппа̄дайато хи пат̣исан̇кха̄наппаха̄нам̣катхитам̣ хоти. сӣлам̣ падат̣т̣ха̄нам̣ катва̄ касин̣апарикаммам̣ а̄рабхитва̄ ат̣т̣ха сама̄паттийо ниббаттентасса виккхамбханаппаха̄нам̣ катхитам̣. сама̄паттим̣ падат̣т̣ха̄нам̣ катва̄ випассанам̣ вад̣д̣хентасса тадан̇гаппаха̄нам̣ катхитам̣. випассанам̣ вад̣д̣хетва̄ маггам̣ бха̄вентасса самуччхедаппаха̄нам̣ катхитам̣. пхале а̄гате пат̣иппассаддхиппаха̄нам̣, нибба̄не а̄гате ниссаран̣аппаха̄нанти евам̣ имасмим̣ сутте саббаппаха̄нам̣ катхитам̣ва хоти.

идан̃хи суттам̣ бхиккхупа̄тимоккхам̣ на̄ма̄ти пора̄н̣а̄ ваданти. идам̣ дивасасса тиккхаттум̣ паччавеккхитаббам̣. па̄то ева васанат̣т̣ха̄нам̣ пависитва̄ нисиннена ‘‘име еттака̄ килеса̄ аттхи ну кхо майхам̣ наттхӣ’’ти паччавеккхитабба̄. саче аттхӣти пассати, тесам̣ паха̄на̄йа ва̄йамитаббам̣. но че пассати, супаббаджитосмӣти аттаманена бхавитаббам̣. бхаттакиччам̣ катва̄ раттит̣т̣ха̄не ва̄ дива̄т̣т̣ха̄не ва̄ нисӣдитва̄пи паччавеккхитаббам̣. са̄йам̣ васанат̣т̣ха̄не нисӣдитва̄пи паччавеккхитаббам̣. тиккхаттум̣ асакконтена две ва̄ре паччавеккхитаббам̣. две ва̄ре асакконтена пана авассам̣ екава̄рам̣ паччавеккхитаббам̣, аппаччавеккхитум̣ на ват̣т̣атӣти ваданти. сесам̣ саббаттха утта̄наттхамева̄ти.

папан̃часӯданийа̄ маджджхиманика̄йат̣т̣хакатха̄йа

анума̄насуттаван̣н̣ана̄ нит̣т̣хита̄.